Ngarkesa e parë e grurit nën iniciativën e Detit të Zi pritet të lëvizë brenda pak ditësh, tha të hënën zëdhënësi i Sekretarit të Përgjithshëm të OKB-së.
Palët në nismë kanë riafirmuar angazhimin e tyre që nga e diela, tha zëvendës zëdhënësi Farhan Haq, pavarësisht goditjeve në portin ukrainas të Odesës, shkruan CNN, përcjell “Bota sot”.
“Për Iniciativën e Detit të Zi, mund t’ju themi se që nga nënshkrimi i marrëveshjes, palët në iniciativë dhe OKB-ja kanë qenë në kontakt të shpeshtë, duke përfshirë edhe ditën e djeshme. Të gjitha palët kanë rikonfirmuar angazhimin e tyre ndaj Nismës,” tha Haq. .
Ai vazhdoi, “Qeveria e Turqisë ka ofruar bujarisht një hapësirë fizike për Qendrën e Përbashkët Koordinuese, ku po krijohen operacionet tani. Deri nesër, të gjitha palët dhe OKB do të kenë një prani në Qendrën e Përbashkët Koordinuese në Stamboll. Ne presim që anija e parë mund të lëvizë brenda pak ditësh. Qendra e Përbashkët Koordinuese do të jetë në kontakt me industrinë e transportit detar dhe do të publikojë procedurat e detajuara për anijet në të ardhmen shumë të afërt”.
