Roma është duke e kërkuar me ngulm Paulo Dybalan.
E ardhmja e argjentinasit vazhdon të jetë njëra nga temat kryesore në këtë afat kalimtar të verës.
Dybala është lojtar i lirë që nga 30 qershori, kur ai u largua nga Juventusi pasi i skadoi kontrata.
Ish-sulmuesi i Palermos dukej afër transferimit te Interi, por ende nuk ka asgjë konkrete – teksa ka mbetur më pak se një muaj deri te fillimi i sezonit në Serie A.
Roma është duke u munduar që të shfrytëzojë këtë situatë. “Tuttomercatoweb” ka raportuar se klubi nga kryeqyteti italian e ka dërguar tashmë ofertën te përfaqësuesit e lojtarit.
Sipas “TMW”, Roma i ka ofruar 28-vjeçarit kontratë 4-vjeçare me pagë prej rreth 6 milionë euro në sezon, plus bonuset.
Dybala thuhet se tani është duke e shqyrtuar këtë ofertë, teksa një përgjigje e tij mendohet se do të jepet të martën e ardhshme.
Përveç Romës dhe Interit, Paulo Dybala është i lidhur edhe me një kalim të mundshëm te Napoli.
