VLEN: AKTGJYKIMI NDAJ ISH-KRERËVE TË UÇK-SË ËSHTË I PADREJTË DHE I PAPRANUESHËM

Me keqardhje dhe indinjatë të thellë e morëm lajmin për aktgjykimin e Dhomave të Specializuara ndaj Hashim Thaçit, Kadri Veselit, Jakup Krasniqit dhe Rexhep Selimit.

Dënimet e shqiptuara janë të rënda dhe të papranueshme. Pas një procesi të gjatë dhe të kontestuar, katër prej figurave kryesore të luftës çlirimtare vazhdojnë të mbahen larg familjeve dhe Kosovës.

Aktgjykimi i sotëm nuk e vuri në diskutim legjitimitetin e UÇK-së. Lufta e Ushtrisë Çlirimtare të Kosovës ishte luftë e drejtë për liri, e zhvilluar përballë shtypjes dhe krimeve të regjimit të Sllobodan Millosheviqit. Këtë të vërtetë historike nuk mund ta ndryshojë asnjë aktgjykim.

Vendimi i sotëm është i shkallës së parë dhe nuk e mbyll këtë çështje. Beteja juridike vazhdon. Presim që në procedurën e ankesës të shqyrtohen seriozisht argumentet e mbrojtjes dhe të korrigjohet kjo padrejtësi.

VLEN qëndron pranë familjeve të Hashim Thaçit, Kadri Veselit, Jakup Krasniqit dhe Rexhep Selimit, pranë bashkëluftëtarëve të tyre dhe pranë popullit të Kosovës.

UÇK-ja luftoi për liri. Kjo e vërtetë nuk rishkruhet.