Një qëllim për vitin e ri? E po, të ndryshojë.
Sulmi i Milanit, mes Krishtlindjeve dhe Epifanisë, rrezikon një ristrukturim të rëndësishëm. Në ndeshjen e fundit të vitit, kundër Romës, Fonseca mund të startojë me Chukwueze, Reijnders dhe Jimenez pas njërit mes Morata dhe Abraham.
Në ndeshjen e parë të vitit 2025, gjysmëfinalen e Superkupës kundër Juves, ai shpreson të nisë me Pulisic, Loftus-Cheek, Leao dhe Morata. Nuk është e thjeshtë që kjo të ndodhë, por thelbi mbetet: Milani ka pasur shumë vështirësi në sulm dhe pret lajme të mira mes 26, 27 dhe 28 dhjetorit.
Rafa Leao është tema kryesore e ditës te kuqezinjtë. Ai ka një zgjatje muskulore në fleksorin e këmbës së majtë, që do ta mbajë jashtë ndeshjes kundër Romës. Për Superkupën mbetet në pikëpyetje. Rafa këtë sezon ka pasur momente të mira dhe të këqija, por kundër Juves do të kishte diçka për të treguar.
Në barazimin 0-0 të kampionatit ishte ndër më të dobëtit, kurrë i rrezikshëm. Pa të, do të ketë eksperimente në formacionin kuqezi. Okafor është jashtë për shkak të një dëmtimi muskulor, Jimenez si anësor është i adaptuar. Pulisic mund të jetë një opsion, por edhe ai po punon për t’u rikthyer nga lëndimi.
Si është Pulisic? “Captain America” (CP11) do të rikthehet të stërvitet me grupin para ndeshjes kundër Romës. Për momentin, është e mundshme që atë mbrëmje të jetë në stol dhe pastaj të shikohet.
Për 3 janarin kundër Juves, trajneri Fonseca ka një ide të qartë: Pulisic titullar. Milani në këtë sezon, mes kampionatit dhe Champions-it, ka shënuar të paktën 3 gola në 7 ndeshje të ndryshme. Në ato ndeshje, Pulisic ka qenë gjithmonë titullar dhe ka shënuar në 4 raste. Nuk është rastësi, sepse bashkë me Tijjani Reijnders, amerikani ka qenë lojtari më i mirë i Milanit. Nëse ai rikthehet, skuadra ndryshon për mirë.
Pra, në të majtë, Leao mund të rikthehet për Superkupën. Në të djathtë ose në qendër, Pulisic do të përpiqet të bëhet gati për Romën. Për t’u vendosur mbetet zona e sulmit. Mendja shkon direkt tek Alvaro Morata, për të cilin flitet pak. Spanjolli ka shënuar 4 gola në kampionat dhe një, në Madrid, në Champions League.
Ai ka më shumë cilësi se sasi. Në 4 muajt e tij të parë te Milani, ai ka konfirmuar se ka klas dhe është një lojtar inteligjent, por jo sulmues që shënon 20 gola në sezon. Për Romën dhe Superkupën, ideja e Milanit është që ai të rikthejë një cilësi të vjetër: të luajë më mirë në ndeshjet e rëndësishme.
Burimi: botasot.info
