Partia opozitare VMRO-DPMNE akuzon se të punësuar në Shërbimin për Punë të Përgjithshme në Qeveri, për tre ditë, kanë qëndruar në Sofje gjoja se janë gazetarë, me harxhimet e Qeverisë. Ata shtojnë më tej se, Qeveria ka harxhuar 2. 5 milion euro për vetura zyrtare, ndërsa 2 milion për mobilje, kafe dhe lule.
VMRO-DPMNE
“Harxhimet për qëndrimin e tyre janë mbuluar nga Qeveria dhe të njejtat nuk kanë qenë edhe të vogla. Bëhet fjalë për gjashtë persona, sipas asaj që është shkruar në media, të punësuar në Qeveri, si gazetarë kanë qëndruar në gjashtë dhoma të ndryshme të hotelit, me pansion të plotë për tre ditë dhe kanë shfrytëzuar vetura të Qeverisë”.
Por, këto akuza Qeveria i përgënjeshtroi dhe i hodhi poshtë. Siç thojnë ata në reagimin e tyre, keqinformimi është se gjashtë punonjësit e Shërbimit në vizitën në Bullgari, kanë qenë të pranishëm për të kryer detyra sipas konkluzionit të theksuar të Qeverisë dhe nuk ka pasur shpenzime shtesë për ta.
Qeveria e RMV-së
“Gjashtë punonjës të SHPPP gjatë vizitës në Bullgari morën pjesë në kryerjen e detyrave – organizimit dhe mbështetjes së aktiviteteve të delegacionit tonë, në të cilin ishin edhe përfaqësues të mediave, në mbledhjen e përbashkët ndërmjet Qeverisë së Republikës së Maqedonisë së Veriut dhe Qeverisë së Republikës së Bullgarisë”.
Ata bënë thirrje për të tërhequr dezinformatën e deklaruar.
Emine Ismaili /SHENJA/
