Mbrojtësi i Bayern Munichut Niklas Sule në fund të këtij sezoni do të jetë lojtar i lirë, ku edhe ka vendosur mos ta vazhdojë të ardhmen me gjigandin gjerman.
Në fakt, Sule ka vendosur që t’i bashkohet rivalit të Bayernit, Borussia Dortmundit, me të cilin do të nënshkruajë kontratën e tij deri në qershor të vitit 2026.
Sule kishte pasur oferta edhe nga klubet e Serie A dhe Premier Ligës angleze, por prioriteti i tij ishte që të qëndrojë në Bundesliga, ku dëshira e vetme e tij ishte t’i bashkohet Dortmundit.
Tani, rreth këtij vendimi ka folur edhe vetë mbrojtësi gjerman, i cili tha që kishte mbetur i impresionuar nga tentimet e Dortmundit për ta bindur atë për të kaluar në “Signal Iduna Park”.
“Unë veçse e kam vendosur para disa javësh që e ardhmja ime ishte te Borussia Dortmundi. E kam pasur ndjenjën që i nevojitem skuadrës si person dhe si futbollist”, tha Sule.
“Isha i impresionuar nga tentimet që ata bënë për mua, kështu që menjëherë e kam ditur se ku do të luajë në të ardhmen”, shtoi mbrojtësi gjerman.
Që prej transferimit nga Hoffenheim te Bayerni, Niklas Sule ka arritur të bëjë 159 paraqitje për kampionin gjerman, duke regjistruar gjashtë gola dhe katër asistime.
