Türkiye dhe Greqia ranë dakord sot për të aktivizuar kanale të shumta komunikimi mes tyre, njoftoi Drejtoria Turke e Komunikimeve, raporton Anadolu.
Presidenti turk Recep Tayyip Erdoğan dhe kryeministri grek Kyriakos Mitsotakis u takuan në margjinat e Samitit të NATO-s në Vilnius të Lituanisë.
“Takimi u zhvillua në një atmosferë të mirë”, shkroi Drejtoria Turke e Komunikimeve në një postim në Twitter.
“Presidenti Erdoğan dhe Mitsotakis ranë dakord se është në të mirën e të dy vendeve që klima pozitive e formuar në marrëdhëniet dypalëshe gjatë muajve të fundit të ketë vazhdimësi dhe konsistencë”, thuhet më tej.
Palët u dakorduan që të vazhdojnë me këtë momentum pozitiv dhe të aktivizojnë kanalet e komunikimit mes dy vendeve në periudhën e ardhshme, thuhet mes tjerash.
Erdoğan dhe Mitsotakis ranë dakord që takimi i nivelit të lartë të Këshillit të Bashkëpunimit të mbahet në Selanik të Greqisë në vjeshtë. “Përveç kësaj, ata angazhuan dy ministrat e Jashtëm të udhëheqin procesin dhe të raportojnë mbi progresin”, shtohet në deklaratë.
Të dy liderët theksuan dëshirën e tyre për komunikim më të shpeshtë në të gjitha nivelet, me qëllim ndërtimin e një klime besimi dhe krijimin e rrethanave të nevojshme për përmirësimin e marrëdhënieve Türkiye-Greqi, thuhet në deklaratë.
