Trepça e Mitrovicës me kryetrajnerin Taib Kabashi, ende nuk po e marrin veten nga humbja në Ferizaj me rezultat 26:24 nga Kastrioti, ndërsa sonte besojnë e shpresojnë në fitore në duel me Rahovecin. Mitrovicasit besojnë fuqishëm në këndelljen dhe i kërkojnë dy pikë që i duhen shumë, por edhe Rahoveci është skuadër që di të jetë “macja e zezë” për Trepçën.
“Të mërkurën nga ora 19:00 e luajmë ndeshjen e fundit të stinorit vjeshtor. Në palestrën tonë e tuajën, ‘Minatori’, e presim skuadrën mike nga Rahoveci.
Synojmë fitore, ndërsa për të arritur te ajo na duhet përkrahja e shikuesve.
Me fitore jemi brenda objektivave për stinorin vjeshtor, me shpresë që stinori pranveror do të jetë edhe më i suksesshëm.
Ata që luftuan për ngjyrat e fanellës në secilën ndeshje, meritojnë përkrahje në sfidën përmbyllëse”, – njofton KH Trepça.
