Protestat e udhëhequra nga të rinjtë, që po tronditin Evropën këtë vjeshtë, përfunduan të shtunën në mbrëmje me dhunë në disa vende njëkohësisht. Përplasje me policinë, plaçkitje dyqanesh dhe bomba molotov u raportuan në Francë, Gjermani, Zvicër, Portugali dhe Shqipëri.
Shkaqet ndryshojnë nga vendi në vend, por kërkesat kryesore janë të njëjta: arsim më i mirë, strehim i përballueshëm dhe kosto më e ulët e jetesës. Shumica e protestuesve marshuan paqësisht, por në fund të tubimeve grupe të maskuara sulmuan policinë dhe pronat.
Zvicër: “Na mjafton edhe në Zvicër”
Qindra protestues u mblodhën të shtunën në mbrëmje në Zürich dhe Basel, në demonstrata të paautorizuara nën sloganin “Na mjafton edhe në Zvicër”. Të dyja tubimet përfunduan me dhunë.
Në Zürich, policia përdori ujëhedhëse, gaz lotsjellës dhe plumba gome për të shpërndarë turmën, që e sulmoi me fishekzjarre, shishe dhe gurë. U dëmtua një veturë patrulle e policisë, ndërsa u dogjën kosha mbeturinash dhe biçikleta elektrike. Trazirat nisën në Lagjen 4 (Kreis 4), ku protestuesit ngritën barrikada dhe u vunë flakën.
Në Basel, sipas policisë, rreth 150 persona u mblodhën në qendër të qytetit rreth orës 21:00. U thyen vitrina dyqanesh, u shkarravitën fasada dhe u dogjën kosha e biçikleta. Incidente u raportuan edhe në Gjenevë.
Gjermani: mbi 100 policë të plagosur në Frankfurt
Mbi 100 mijë persona marshuan të shtunën në më shumë se 30 qytete gjermane, me thirrjen e lëvizjes “Gen Z regelt” (Gen Z e rregullon vetë). Ata kërkuan ndryshime në sistemin arsimor dhe ulje të kostos së jetesës.
Situata më e rëndë ishte në Frankfurt. Sipas ministrit të Brendshëm të Hesenit, Roman Poseck, persona me kapuça dëmtuan 17 dyqane, plaçkitën pesë prej tyre dhe hodhën edhe bomba molotov. Nga 1.300 policët e angazhuar, mbi 100 u plagosën. U arrestuan 54 të dyshuar, të moshës 13 deri në 29 vjeç. “Jam i tronditur nga ajo që pashë. Kështu nuk mund të vazhdohet”, deklaroi Poseck.
Ministri tha se shumica e të arrestuarve janë shtetas gjermanë. Megjithatë, shtoi ai, sipas vlerësimit të policisë, forcat e rendit u përballën me 1.000 deri në 1.500 trazirëbërës të dhunshëm, kryesisht me prejardhje migrante. Edhe ministri federal i Brendshëm, Alexander Dobrindt, fajësoi grupet e dhunshme të së majtës dhe “trazirëbërësit nga komuniteti migrant” dhe kërkoi dënime të ashpra.
Dhunë u raportua edhe në Këln, ku policia përdori ujëhedhëse, si dhe në Berlin. Lëvizja “Gen Z regelt” u distancua publikisht nga çdo formë dhune.
Francë: hetim për tentativë vrasjeje
Në Francë, ku nisi vala e protestave, rreth 320 mijë persona dolën në rrugë në Paris, Marsejë, Grenoble, Bordo, Lion dhe Tuluzë. U arrestuan mbi 770 persona. Prokuroria e Parisit ka hapur hetim për tentativë vrasjeje ndaj personave me autoritet publik, pasi u hodhën mjete ndezëse kundër një grupi prej rreth 15 xhandarësh dhe policësh.
Gjithsesi, situata ishte më e qetë se më 17 tetor. Atë natë u arrestuan 2.600 persona dhe u plaçkitën deri në 3.000 dyqane, në një nga netët më të rënda të trazirave urbane në historinë e fundit të Francës.
Shqipëri: 350 të lënduar, 269 të mitur të arrestuar
Në Tiranë, protestuesit kërkuan dorëheqjen e kryeministrit Edi Rama dhe e akuzuan qeverinë për korrupsion. Në fund të tubimit, kryesisht paqësor, të rinj të maskuar hodhën gurë dhe molotovë ndaj policisë dhe u vunë flakën koshave të mbeturinave.
Sipas Ministrisë së Brendshme, protestat kanë lënë deri tani 350 të lënduar, mes tyre 200 policë. Janë arrestuar 269 të mitur.
Protestat në Shqipëri nisën në maj me lëvizjen e njohur si “Revolucioni i Flamingove”, kundër projektit të një resorti luksoz në ishullin e Sazanit, të mbështetur nga Jared Kushner, dhëndri i presidentit amerikan Donald Trump. Më 13 tetor iu bashkuan studentët, që protestojnë kundër tarifave të larta, mungesës së mbështetjes financiare, kushteve në universitete dhe perspektivës së dobët për punë. Rama ka refuzuar thirrjet për dorëheqje dhe ka fajësuar Iranin e Rusinë për nxitjen e protestave.
Portugali: policia shpërndan kampet
Në Lisbonë, policia i largoi me forcë protestuesit nga sheshi Rossio rreth orës 4:30 të së dielës, pas marshimit të mijëra personave kundër krizës së strehimit. U shpërnda me forcë edhe një kamp më i vogël në Porto. Protestuesit kërkojnë tërheqjen e një projektligji që e lehtëson dëbimin e qiramarrësve dhe heq kufizimet e qirasë për kontratat e reja.
Një brez që kërkon përgjigje
Këtë vjeshtë protestat kanë përfshirë një varg vendesh evropiane, nga Franca, Spanja dhe Italia deri në Belgjikë, Austri e Serbi. Ajo që i bashkon është brezi që i udhëheq: të rinj që ndihen të përjashtuar nga tregu i banesave, të zhgënjyer nga sistemi arsimor dhe të pasigurt për të ardhmen.
Burimi: botasot.info
