Klan News ka siguruar një tjetër përgjim të SPAK që fakton miqësinë e Arben Ahmetajt me Klodian Zoton e Mirel Mërtirin.
Rezulton se më datë 5 Shtator 2017, në orën 16:38, biznesmeni Mërtiri ka përdorur telefonin e Zotos për të komunikuar me shoferin e ministrit të Financave dhe të Ekonomisë.
Mërtiri i kërkon Gonit të lajmërojë Arben Ahmetajn se i është thyer telefoni. Nga biseda e tyre, kuptohet që Mirel Mërtiri, i cili njihet edhe si Klodian Mërtiri, ka njohje dhe me shoferin e ministrit.
Shoferi: O Zoto!
Mertiri: O Gono!
Shoferi: Çfarë bën?
Mërtiri: Klodi jam, Klodi…
Mërtiri: Çfarë bën? Ça bëre ti lale?
Shoferi: Mirë.
Mërtiri: Ore se kam telefonin se m’u thye, thuaj i çik fratelos që ta dijë ai se mos më merr mua, kur mundet të më kontaktojë e s’më kap.
Shoferi: Të të marri këtu?
Mërtiri: Jo mo jo, ky është telefoni i Zotos, po pati gjë t’i shkruajë Zotos dhe i dal unë në telefon.
Mërtiri: Mirë mirë, thuaj ti se m’u thye telefoni.
Shoferi: E mirë vëlla, mirë.
Mërtiri: Si ka qenë ai?
Shoferi: Mirë po ja është në mbledhje, se kam takuar fare që nga ora 11.
Mërtiri: Po iku mirë në mëngjes? Vajtët mirë?
Shoferi: Po mirë, i çik presion rrugës, u nisëm vonë, u nisëm nga ora 9:20.
Mërtiri: Po andej nga Maqedonia, çfarë u bë?
Shoferi: Po, kanë dërguar Tanin, nuk e di.
Rezulton se për inceneratorin e Elbasanit, prokuroria e këtij rrethi ka hapur hetimet që në vitin 2017, por më pas gjykata mbylli çështjen me argumentin se nuk u gjetën prova.
SPAK ka ngritur ndaj Arben Ahmetajt tre akuza: pastrim parash, korrupsion pasiv në 6 raste dhe pastrim i produkteve të veprës penale.
Në kërkesën e SPAK drejtuar Kuvendit, thuhet se Arben Ahmetaj ka marrë përfitime të drejtpërdrejta e të tërthorta për inceneratorët, nga Klodian Zoto e Mirel Mërtiri.
