Bashkimi Evropian (BE) kryesisht dëshiron të arrijë një zgjidhje me Shtetet e Bashkuara në lidhje me tregtinë përmes negociatave, por nëse nuk arrijnë ta prodhojnë një të tillë do të përgjigjet me kundërmasa.
Kështu deklaroi sot në Uashington komisionari i Komisionit Evropian për Ekonominë, Valdis Dombrovskis në takimin pranveror të Fondit Monetar Ndërkombëtar dhe Bankës Botërore.
Ai tha se BE-ja kishte ofruar tashmë për të blerë më shumë gaz natyror të lëngshëm nga SHBA-ja dhe për të ulur tarifat për importet e mallrave të caktuara, duke shtuar se Brukseli do të mirëpriste qartësi më të madhe nga Uashingtoni për pritjet e tij.
“BE qëndron pranë partneriteteve të saj ekzistuese dhe synon t’i thellojë ato, por ne gjithashtu do të negociojmë partneritete të reja në mbarë botën për të forcuar sigurinë tonë ekonomike në vend,” tha ai duke shtuar se BE-ja është një partner tregtar i besueshëm dhe i parashikueshëm dhe do të mbetet i tillë.
Blloku i 27 vendeve tashmë ka marrëveshje tregtare me 76 vende, së fundmi ka përfunduar negociatat për një partneritet të ri me Meksikën, Zvicrën dhe katër vende të Amerikës Jugore që janë anëtare të tregut të përbashkët Mercosur, vazhdon bisedimet me Indinë, Tajlandën, Filipinet dhe Indonezinë dhe gjithashtu ka filluar negociatat tregtare me Emiratet e Bashkuara Arabe.
“Qëllimi i këtyre marrëveshjeve tregtare është të krijojnë partneritete të favorshme që janë të besueshme dhe të bazuara në rregulla,” tha Dombrovskis.
Zyrtarët evropianë kanë shmangur mesazhet e ashpra në përgjigjet e tyre ndaj kritikave të ashpra të presidentit Donald Trump ndaj marrëdhënieve tregtare SHBA-Evropë dhe kanë theksuar nevojën për lidhje të besueshme dhe të parashikueshme.
BE ngriu kundërmasat e para kundër tarifave të Trump për 90 ditë më 10 prill, por presidentja e Komisionit Evropian Ursula von der Leyen paralajmëroi se të gjitha opsionet janë ende në tryezë në lidhje me kundërmasat.
Burimi: botasot.info
