Kontrata e Jorghino me Chelsea skadon në qershorin e vitit të ardhshëm, me “Blutë e Londrës” që ende nuk e kanë bindur mesfushorin që të rinovojë. Drejtuesit londinezë duan që italiani të vijojë aventurën në “Stamford Bridge” dhe bisedimet kanë nisur.
Megjithatë, për Jorginho interes ka dhe nga Serie A dhe La Liga. Juventus e ka në listën e dëshirave lojtarin e kombëtares së Italisë, por situata e krijuar pas hetimit të ngritur nga Prokuroria e Torinos mund të stepë Jorginho, për të mos zgjedhur “Zonjën e Vjetër”.
Barcelona në krahun tjetër po ashtu e sheh si një alternativë me shumë potencial për të rritur cilësinë në mesfushë. Fakti që në verë Jorginho mund të largohet si një lojtarë i lirë i tundon katalanasit, që duhet të tregojnë kujdes në lëvizjet në merkato.
Këtë edicion, 31-vjeçari është aktivizuar në 13 ndeshje në Premier League, teksa ka shënuar dhe dy gola. Mesfushori aktivizohet me Chelsea nga edicioni i 2018-tës, ndërsa në të shkuarën ka qenë pjesë e Veronës dhe Napolit në Serie A.
