Për një stacion plazhi në Ksamil burrë e grua, Sofie dhe Foni Doda po përballen me mafien shtetërore dhe të fortët e zonës. Prej kohësh ata e kanë shfrytëzuar stacionin e plazhit me kontrata të rregullta. Aty ndërtuan edhe një strukturë, e cila u përdor çdo vit nga IKMT-ja si formë për t’u zhvatur atyre para, duke qenë se ishte e palegalizuar.
Sa ishin pagesat që iu kërkonin?
5 mijë euro, 3 mijë euro, 7 mijë euro.
Këtë e merrte IKMT? Kush e merrte?
Drejtuesit e tyre.
Çudia e kësaj historie është se IKMT-ja, vendosi të shembë vetëm strukturën e biznesit të Sofies, duke mos prekur asnjë ndërtim tjetër, i cili ishte ndërtuar në të njëjtën kohë kur ndërtoi familja Doda. Sofie Doda hedh dyshime të forta, se IKMT-ja, pasi mori disa herë paratë e ryshfetit, u bë pjesë e planit, për t’ia marrë çiftit këtë hapësirë dhe për t’ia dhënë atë në përdorim dikujt tjetër.
“Kemi ndonjë ndryshim nga të tjerët ne? Urdhëro, ndërtesat e të tjerëve. Ishte i vetmi plazh që u bë këtu. Më thoni kush ka dorë këtu? Ishte i vetmi plazh që u prish ndërtesa”, thotë Sofia.
Pasi ndërtesa tek stacioni i plazhit u shemb rreth 2 vjet më parë, këtë hapësirë Agjencia Kombëtare e Bregdetit ia kaloi një personi tjetër, edhe pse familja Doda ishte aplikuese për t’a përfituar, siç kishte bërë çdo vit që nga 2012. Personi që kishte marrë të drejtën për ta shfrytëzuar, Markeljan Musaj, sipas AKB e kishte përfituar këtë kontratë me anë të falsifikimit. Kjo u vërtetua në seancën gjyqësore që paditësi, Markeljan Musaj kishte hapur, për shkak se pretendonte se leja e shfrytëzimit i takonte atij.
“Pas kryerjes së verifikimeve nga Agjencia Kombëtare e Bregdetit, Sarandë, ka rezultuar se subjekti Musai nuk ka strukturë, por kjo strukturë i përket subjektit Flamure Ibrahimi. Në këtë zonë aktualisht nuk ka strukturë shërbimi, pasi objekti është prishur si i paligjshëm. Në të tilla kushte është refuzuar aplikimi i paditësit dhe është miratuar kërkesa e subjektit Foti Doda”, thuhet vendimin e gjykatës.
Përballë këtyre fakteve Markeljan Musaj vendos të tërhiqet nga gjyqi, dhe për këtë arsye u vendos pushimi i çështjes. Edhe pse me një kontratë nga Agjencia Kombetare e Bregdetit, familja Doda nuk mundi ta shfrytëzonte kontratën për shkak se pala tjetër nuk e lejoi me forcë, duke sfiduar hapur institucionet shqiptare dhe ligjet e këtij vendi.
“Pas mbarimit të gjyqit vajta me punëtorë për ta hapur. Ka procesverbale që na kanë rrahur. Nuk është i imi, por kam investuar me lejen e shtetit. Bashkia është përdoruese e asaj toke, me AKB-në. ajo duhet të na mbrojë”, thotë Sofia.
Thirrja e Sofies shkon për Kryeministrin, duke deklaruar se korrupsioni që ai pretendon se po e lufton po rritet çdo ditë e më shumë. Po ashtu 60 vjeçarja kërkon ndihmë nga Ambasada Amerikane dhe ajo Greke, për të fituar të drejtën e saj.
“Korrupsioni po vazhdon. Ai (Rama) flet vazhdimisht për korrupsionin. Nuk ndalon, por shtohet më shumë. Janë në dijeni edhe Ambasada greke dhe ambasada amerikane dhe dua edhe mbështetjen. Nuk gjej të drejtën, nuk ma japin të drejtën”, shprehet më tej Sofia.
Ajo thotë se përballë tyre është një bandë, e cila ka lidhje të forta me administratën shtetërore, konkretisht Bashkinë Sarandë, IKMT-në, etj.
“Ata nuk marrin parasysh letrat ose kontratat, por vendosin vetë. E di që u kanë rënë edhe njerëzve të tjerë në qafë”, deklaron Sofia.
Edhe pse në favor ka ligjet e shtetit dhe dokumentet, duket se këto të fundit as nuk ekzistojnë dhe konsiderohen nga pala tjetër, duke sfiduar kështu drejtpërdrejtë shtetin shqiptar./BW
