Situata e zjarreve në Shqipëri, Forcat e Armatosura në gatishmëri
Ministria e Mbrojtjes e Shqipërisë informoi sot se Forcat e Armatosura disponojnë dhe kanë në gatishmëri mjetet e nevojshme fluturuese, të parashikuara për përdorim në përmbushje të detyrave e operacioneve që duhet të kryejnë edhe në raste emergjencash si zjarret.
“Forca Ajrore ka helikopterë të kompletuar dhe të pajisur me mjete për operacione për mbështetje të emergjencave mjekësore si edhe helikopterë ushtarakë të mesëm modernë të gjeneratës së katërt. Si rregull ata i nënshtrohen kërkesave rigoroze të mirëmbajtjes dhe riparimit, bazuar mbi periudha përdorimi dhe kohë fluturimi. Në këtë proces, një pjesë e helikopterëve ushtarakë ‘Cougar’, të cilët prej një kohe të gjatë kanë qenë pjesëmarrës aktivë në operacione të shumta të emergjencave në kohë përmbytjesh, zjarresh, tërmeti, kushteve ekstreme të motit, në ndihmë të komunitetit, pjesëmarrjes në stërvitjet e ndryshme në Forcat e Armatosura, si dhe atyre me NATO-n të zhvilluara në vendin tonë, kanë kaluar në procesin e mirëmbajtjes dhe vënies në gatishmëri, në nivelin e tretë të mirëmbajtjes, proces që bëhet vetëm nga uzina jashtë vendit, të specifikuara për këtë nivel modern pajisjesh”, thuhet në njoftim.
Po ashtu, Ministria e Mbrojtjes njofton se një pjesë e helikopterëve “Cougar” të riparuar përmes praktikës së re të bashkëpunimit me Agjencinë e Prokurimit të NATO-s (NSPA), ndodhen në Shqipëri.
“Ndërkohë për çdo situatë dhe nevojë reale kur vihet në rrezik jeta e njerëzve apo banesat Shqipëria bashkëpunon me Mekanizmin e Bashkimit Evropian të Mbrojtjes Civile, Emergency Response Coordination Centre (ERCC) dhe në bashkëpunim me partnerët e saj është në gjendje të garantojë sigurinë. Edhe vendet fqinje përdorin këtë mekanizëm për të përballuar nevojat e tyre në raste emergjencash. Siç e kemi thënë edhe më parë kapacitetet tona të brendshme janë të limituara. Ndërkohë edhe vende si Turqia, Greqia apo Italia mbështeten te mekanizmi evropian, sepse emergjencat specifike natyrore nuk përballohen dot vetëm me kapacitete të brendshme. Në vëmendje të medias, kujtojmë se tabela e organizimit dhe pajisjes të FA, numrave dhe dokumenteve që lidhen me të konsiderohet informacion i klasifikuar konfidencial”, thuhet në njoftim.
