Ishte fillimi i vitit 2014, kur Arben Vitia u bë pak më i njohur për opinionin e Kosovës. Deri atë kohë, ai edhe mund të ishte figurë e rëndësishme brenda Vetëvendosjes, por në publik dihej shumë pak për aktivitetin e tij politik.
Fitorja e Shpend Ahmetit dhe ardhja e tij në krye të Komunës së Prishtinës, i dha dritë figurës politike të Arben Vitisë. Në kabinetin e Ahmetit, Arben Vitisë iu besua një post me shumë peshë, ai i drejtorit të Drejtorisë për Shëndetësi. Ndoshta kishte ardhur koha që të shpaguhej puna dhe aktiviteti i tij në heshtje për shumë vite brenda aktivitetit politik të qendrës së Vetëvendosjes në Prishtinë.
Koordinator i Qendrës së Prishtinës
Në një komunë me shumë probleme, ku kaosi urban ishte tema më e nxehtë e asaj kohe, Vitia ia doli të profilizohej si një ndër figurat më aktive brenda komunës, duke bërë ndryshime të rëndësishme nëpër qendrat e mjekësisë familjare dhe duke instaluar një mentalitet pune ndryshe nga të tjerët.
Në një kohë kur Shpend Ahmeti dukej se kishte humbur mbështetjen e elektoratit të Prishtinës, dhe kur e kërkonte besimin qytetar për një mandat të dytë, Arben Vitisë iu besua edhe një detyrë e rëndësishme brenda Vetëvendosjes. Ai unanimisht me votat e kryesisë së partisë, zgjidhet Koordinator i Qendrës së Prishtinës. Kjo sikur edhe dha frytet e veta sepse Shpend Ahmeti fitoi edhe mandatin e dytë për të udhëhequr me komunën e Prishtinës, paçka se diferenca në vota ishte shumë e vogël.
Kësisoj Arben Vitia, u bë njëra ndër figurat më të respektuara brenda Vetëvendosjes. Një mbështetje të madhe e mori sidomos në kohën e largimit të figurave të rëndësishme(Molliqaj dhe të tjerët), kur Vitia u pozicionua në krahun e Kurtit, veprim ky që i kushtoi me largim nga vendi i punës, sepse Shpend Ahmeti tashmë filloi shkarkimin e drejtorëve që mbronin Kurtin.
Kulminacioni i figurës së Arben Vitisë ishte aktiviteti politik si ministër i Shëndetësisë në Qeverinë e udhëhequr nga Albin Kurti. Lufta ndaj një virusi krejt të panjohur, ishte sfida që i trokiti në derë qysh në muajt e parë pas marrjes së mandatit. Njerëzit e kishin krijuar tashmë besimin sa i përket profesionalizmit të Vitisë, por secilën herë ekzistonte frika dhe pyetjet ishin të shumta.
Qetësi dhe siguri
Qetësia dhe serioziteti ishin tiparet që e dallonin Vitinë nga të tjerët, aq sa dalja e tij në konferencat për shtyp në kohën e pandemisë, arriti që të krijonte qetësi dhe siguri tek qytetarët e Kosovës. Tashmë Albin Kurti, e kishte afër vetës njeriun që mbulonte edhe gabimet e ministrave të tjerë, e që këta mbeten nën hijen e shkëlqimit të Arben Vitisë.
Teksa zgjedhjet komunale po afroheshin, Vitia po projektohej si kryetar në ardhje i Komunës së Prishtinës. Një garë që dihej fituesi, ende pa filluar procesi zgjedhor sepse figura e Vitisë ishte në kulminacion dhe askush nuk do ta mendonte se pikërisht aty filloi fundi i tij politik, bile as kundërshtarët e tij që dukeshin tashmë jashtë garës.
Kjo u dëshmua edhe në raundin e parë të zgjedhjeve, kur Vitia ani pse u angazhua vonë në garën zgjedhore, arriti që të fitojë bindshëm por, jo aq sa për ta shmangur balotazhin. Në një sistem zgjedhor siç e ka Kosova, balotazhi është fenomen që hedhë poshtë secilin kalkulim politik.
Pozita e kryetarit të kryeqytetit, është trampolina më e mirë për të arritur edhe pozitat më të larta udhëheqëse brenda shtetit. Ky është një rregull i pashkruar, por që ka ndodhur në shumë shtete të botës.
Ku ka humbur Arben Vitia
Por, Arben Vitia e humbi balotazhin ndaj kandidatit të LDK-së, Përparim Rama. Ndoshta është e padrejtë mënyra se si e humbi garën për Prishtinën por, kështu funksionon sistemi zgjedhor në Kosovë. Në fund të fundit, kështu erdhi në pushtet edhe vet Vitia, në kohën kur e rrëzuan nga pushteti Isa Mustafën.
Kanë kaluar më shumë se 3 muaj që kanë përfunduar Zgjedhjet Komunale dhe është e drejtë që njerëzit të pyesin se ku ka humbur Arben Vitia. Figura pothuajse më e ndritshme brenda Vetëvendosjes për më shumë se 2 vite. Shkëlqimi u shua dhe shija e humbjes ka krijuar hijen e padukshme në të cilën po qëndron tash e 3 muaj Vitia.
Politika është dielli që ndalë rrezet e shkëlqimit, duke të dërguar në botën e hijes, prej të cilës shumë pak njerëz arrijnë që të gjejnë prapë rrezet e diellit.
Arben Vitia e ka zgjedhur rrugën e fshehjes dhe heshtjes. Pranimi i humbjes po del të jetë aktiviteti i tij i fundit politik dhe kafshata që nuk po kapërdihet.
