SHBA-ja po rrit praninë e saj përgjatë krahut lindor të NATO-s dhe është e vendosur të vazhdojë të jetë e pranishme në Baltik, tha sot sekretari amerikan i Mbrojtjes, Lloyd Austin, raporton Anadolu.
“Shtetet e Bashkuara mbeten të përkushtuara për lirinë dhe sovranitetin e aleatëve tanë baltikë”, tha Austin gjatë një konference për shtyp në kryeqytetin estonez Talin.
Ai përshëndeti ndihmën dhe “lidershipin e jashtëzakonshëm” të Estonisë në mbështetjen e Ukrainës dhe vuri në dukje se SHBA-ja qëndron e bashkuar me Estoninë për të penguar çdo kërcënim ndaj të dy vendeve dhe për sigurinë e përbashkët.
“Pra, kam besim se dy demokracitë tona krenare do të punojnë së bashku për të përballuar çdo sfidë dhe së bashku do të vazhdojnë të forcojnë sigurinë transatlantike dhe të mbrojnë rendin ndërkombëtar të bazuar në rregulla që na mban të gjithëve të sigurt”, shtoi Austin.
Duke folur për investimet e Estonisë në mbrojtje, ai tha se shpenzimet dhe furnizimi me aftësi të reja janë “vendimtare” në frenimin e sulmeve kundër NATO-s.
