Emiratet e Bashkuara Arabe dhe Shtetet e Bashkuara kanë hyrë në një partneritet për të rritur investimet në projektet e energjisë së pastër në shumën prej 100 miliardë dollarësh dhe për të rritur kapacitetin e energjisë së pastër me 100 gigavat në nivel global deri në vitin 2035, njoftoi agjencia shtetërore e lajmeve e Emirateve- WAM.
“Së bashku, ne do të mbështesim një gamë të gjerë investimesh në teknologjitë e reja të energjisë – në vendet tona, në mbarë botën dhe në ekonomitë në zhvillim,” tha i dërguari i SHBA për Energjinë Amos Hochstein në një deklaratë, sipas një raporti të WAM.
Ai shton më tej se ky partneritet do të “bashkojë dhe do të nxisë” financimin e sektorit privat dhe publik dhe do të mbështesë inovacionin në energjinë e pastër, menaxhimin e emetimeve të karbonit dhe metanit, zhvillimin e reaktorëve të avancuar, duke përfshirë reaktorët e vegjël modularë dhe de-karbonizimin e industrisë dhe transportit.
Sipas kësaj nisme, Emiratet e Bashkuara Arabe, një anëtare e Organizatës së Vendeve Eksportuese të Naftës (OPEC) dhe Shtetet e Bashkuara do të ofrojnë asistencë teknike, financiare dhe menaxhuese për projektet e energjisë komerciale dhe të qëndrueshme për mjedisin në vende të tjera.
“Tranzicioni i energjisë ka nevojë për një plan realist, praktik dhe ekonomikisht të qëndrueshëm për të arritur përparimin klimatik, i cili mundëson sigurinë e energjisë dhe rritjen ekonomike gjithëpërfshirëse,” tha sulltan Al Jaber, ministër i Industrisë dhe Teknologjisë së Avancuar dhe i Dërguari Special i Emirateve të Bashkuara Arabe për Ndryshimet Klimatike.
Nisma do të fokusohet gjithashtu në investimin në zinxhirët e furnizimit të përgjegjshëm dhe elastik, duke promovuar investimet në minierat e gjelbra, si dhe prodhimin e mineraleve dhe materialeve jetike për tranzicionin e energjisë.
