Superylli i muzikës Shakira ka refuzuar një marrëveshje për pranimin e fajësisë nga prokurorët në një rast mashtrimi tatimor prej 14.5 milionë euro në Spanjë dhe tani është një hap më afër gjykimit, tha zëdhënësi i saj të mërkurën.
Këngëtarja kolumbiane, e cila ka shitur më shumë se 80 milionë disqe në mbarë botën, ka paguar gjithmonë të gjitha detyrimet e saj tatimore, thuhet në deklaratë. Ajo e konsideron rastin “një shkelje të plotë të të drejtave të saj”.
“Këngëtarja është plotësisht e bindur për pafajësinë e saj dhe për këtë arsye nuk e pranon marrëveshjen”, thuhet në deklaratë.
Kushtet e zgjidhjes së propozuar nuk janë bërë të ditura, por Shakira akuzohet se nuk ka paguar 14.5 milionë euro të ardhura nga taksat mes viteve 2012 dhe 2014, e cila periudhë, sipas avokatëve të saj, këngëtarja nuk ka jetuar në Spanjë.
Këngëtarja 45-vjeçare, të cilën shumë e quajnë “mbretëresha e muzikës latine”, pohon se u transferua në Barcelonë në vitin 2015. Ajo jetonte atje me futbollistin Gerard Pique, lojtar i klubit të futbollit të Barcelonës. Çifti ka dy fëmijë, por së fundmi ata nuk jetojnë më bashkë.
Këngëtarja thotë se ndërsa ekipi i saj ligjor nuk u pajtua për borxhin e pretenduar, ajo pagoi 17.2 milionë euro që zyra spanjolle e taksave pretendonte se i detyrohej.
Sipas saj, prej vitesh nuk ka asnjë borxh të papaguar ndaj organeve tatimore. Gjykata tani do t’i dërgojë asaj një fletëthirrje në seancë dhe do të caktojë datën e nisjes së procesit gjyqësor.
