Në shtatë deri në dhjetë ditët e ardhshme, Serbia do të heqë ndalesën për eksportin e grurit, misrit, miellit dhe vajit për gatim për Maqedoninë e Veriut. Kjo u dakordua në takimin e sotëm në Beograd të ministrit të Bujqësisë, Ljupço Nikolovski, me homologun e tij serb, Branislav Nedimoviç.
“Si pjesë e instrumenteve të ofruara nga iniciativa “Ballkani i hapur”, me zëvendëskryeministrin e Republikës së Serbisë, Nedimoviç, ramë dakord që 7 deri në 10 ditët e ardhshme Serbia të heqë për Maqedoninë e Veriut ndalimin e eksportit të grurit, misrit, miellit dhe vajit për ushqim dhe të fillojë shpërndarjen e sasive të dakorduara mes dy vendeve. Të gjitha marrëveshjet e partnerëve tanë ekonomikë nga të gjitha dhomat e tregtisë, do të realizohen”, tha Nikolovski.
Sipas tij, qytetarët duhet të rrinë të qetë pasi Maqedonia e Veriut do të ketë sasi të mjaftueshme të këtyre kulturave strategjike. Gjithashtu shtoi se qeveria po bën përpjekje maksimale për gjetjen e tregjeve alternative për shitjen e produkteve vendore .
