Në fillim të dhjetorit, një samit i ri i liderëve të BE-së dhe Ballkanit Perëndimor do të mbahet për herë të parë në një nga vendet e Ballkanit, në Maqedoninë e Veriut apo në Shqipëri, njoftojnë mediat serbe duke cituar burime diplomatike në Bruksel.
Siç raporton korrespondenti i Agjencionit Informativ të Maqedonisë nga Beogradi, ai takim duhet të japë një sinjal të ri, të fuqishëm të përkushtimit të BE-së për Ballkanin Perëndimor, me një mesazh për vendet e rajonit që të përfitojnë nga mjedisi i ri politik në Evropë, në mënyrë që për të përmirësuar procesin e anëtarësimit dhe zgjidhjen e çështjeve të hapura në rajon.
Edhe pse konsultimet janë ende në vazhdim, qarqet diplomatike evropiane vlerësojnë se Serbia nuk ka shanse ta mbajë këtë takim në nivelin më të lartë, para së gjithash për shkak të mosrespektimit të politikës së jashtme të BE-së nga Beogradi ndaj luftës në Ukrainë.
“Qëndrimet dhe retorika e Serbisë për sanksionet kundër Rusisë dhe luftën në Ukrainë janë të papranueshme për shumë shtete anëtare”, deklarojnë diplomatët evropianë, dhe vlerësojnë se samiti ndoshta do të mbahet në Maqedoninë e Veriut apo në Shqipëri.
Në Bruksel vlerësojnë se lufta në Ukrainë ka forcuar ndërgjegjësimin në Evropë për rëndësinë e politikës së zgjerimit për stabilitetin e kontinentit, gjë që tregon edhe gatishmëria e treguar për përparim të shpejtë në bisedimet me Ukrainën dhe vendet e tjera që nuk ishin pjesë e procesit deri vonë.
“Është e rëndësishme që vendet e Ballkanit Perëndimor të mos qëndrojnë anash dhe në këtë mënyrë të humbasin momentin për përparim më të shpejtë”, theksojnë burime diplomatike dhe vlerësojnë se në muajt në vijim do të kërkohen rrugë për progres konkret në çështje si fillimi i negociatave me Maqedoninë e Veriut, progres më konkret në dialogun ndërmjet Beogradit dhe Prishtinës, statusi kandidat për Bosnën dhe Hercegovinën dhe kërkesa e Prishtinës për liberalizimin e vizave.
Ftesa të veçanta për këtë Samit thuhet se do t’u dërgohen dhe shteteve si: Mbretëria e Bashkuar, Turqia, Izraeli, Ukraina dhe Azerbajxhani.
