Kriza mes Rusisë dhe Ukrainës vazhdon të zgjerohet Pasi njohu pavarësinë e republikave filoruse të Donetskut e Luhanskut, që ndodhen në Donbas në lindje të Ukrainës, tanket dhe trupat ruse hynë në këtë territor, i cili në sytë e komunitetit ndërkombëtar është në fakt ukrainas.
Shtetet e Bashkuara, Britania e Madhe dhe Bashkimi Europian vendosën ato që mund të konsiderohen si sanksionet e para të forta kundër Moskës. Masa të rënda financiare do të merren ndaj bankave ruse, oligarkëve rusë dhe familjarëve të tyre, pas asaj që konsiderohet si shkelje flagrante e ligjit ndërkombëtar, sulmi ndaj vendit fqinj. Sanksionet prekin jo vetëm bankat ruse, por edhe borxhin sovran të Rusisë.
Ato do të zbatohen ndaj bankës VEB dhe ndaj Promsvyazbank, e cila shërben si banka e ushtrisë ruse dhe kryen transaksionet në fushën e mbrojtjes. Nga dita e sotme, ato hyjnë në fuqi edhe ndaj elitave ruse dhe të afërmve të tyre.
Sipas presidentit amerikan Joe Biden, një goditje e tillë ndaj borxhit sovran të Rusisë, do të thotë se praktikisht Rusisë do t’i ndërpritet financimi perëndimor.
“Askush prej nesh nuk do të mashtrohet nga pretendimet e Presidentit rus Vladimir Putin për Ukrainën. Ai po krijon një racionalitet për të marrë më shumë territore me force. Ky është fillimi i një sulmi rus ndaj Ukrainës”, tha Biden.
Biden shtoi se kjo është vetëm vala e parë e sanksioneve gjunjëzuese që SHBA dhe aleatët janë gati të vendosin mbi Rusinë nëse sulmi i saj mbi Ukrainë, zgjerohet përtej Donbasit.
Në shenjë solidariteti, ai autorizoi dislokimin e forcave amerikane drejt vendeve baltike në krahun lindor të NATO-s pranë kufirit me Rusinë. 800 ushtarë amerikanë u nisën nga Italia, së bashku me 20 helikopterë Apache dhe të paktën 8 bombardues F35.
Në këtë mënyrë, SHBA e NATO po sfidojnë dhe ato Putinin, një nga kërkesat e të cilit për perëndimin ishte tërheqja e forcave ushtarake të aleancës veri-atlantike nga territoret e ish republikave sovjetike.
