Gazetarja e BBC-së u ka folur familjeve, fëmijët e të cilëve janë kapur në konflikt. Fëmijët e tyre kanë plagë fizike dhe psikologjike, dhe disa kanë vdekur, shkruan BBC, përcjell Bota sot.
Elisei Ryabukon, 13 vjeç, vdiq në mars kur kolona e makinave në të cilën ndodhej u vu nën zjarr. Vëllai i tij tre vjeçar mbijetoi.
Nëna e tyre Inna thotë se dëshiron drejtësi për djalin e saj: “Dua që bota të dijë për krimet e Rusisë. Dua që çdo viktimë të numërohet. Dua që Rusia të mbajë përgjegjësi për njerëzit, fëmijët dhe gratë, ata kanë vrarë në tokën tonë”.
Një tjetër fëmijë i kapur në konflikt është 13-vjeçari Ilya Bobkov. Ai u arratis së bashku me familjen e tij nga Bucha, jashtë Kievit.
Ilya thotë: “Më 24 shkurt kur filluan luftimet, unë u trondita. E prisja që të ishte një ditë e zakonshme, do të shkoja në shkollë, do të bëja detyrat e shtëpisë dhe do të luaja me lojëra.”
Ilya dhe familja e tij u larguan nga Bucha përmes një korridori humanitar. Gjatë udhëtimit ata panë tanke dhe kufoma. “Zgjohem me djersë të ftohta nga ëndërrat e tmerrshme se familja ime do të vritet ose merret peng nga rusët,” thotë ai.
OKB vlerëson se rreth dy të tretat e 7.8 milionë fëmijëve të Ukrainës janë zhvendosur.
