Në garën e fundit sezonale në MotoGP, që do të zhvillohet pas 10 ditësh në pistën e Valencia, ku do të përcaktohet edhe kampioni i botës për pilotë, do të jetë i pranishëm edhe Valentino Rossi. Ish-piloti italian do të jetë në pistë për të mbështetur patriotin e tij Francesco Bagnaia (Ducati), që kryeson renditjen ndaj francezit Fabio Quartararo.
Bagnaia është një nxënës i 9 herë kampionit të botës, pasi ka dalë nga Akademia e Valentino Rossi.
Madje në kategoritë e vogla (Moto 2 dhe Moto 3) ka garuar pikërisht me skuadrën e Rossi, që ka qenë mentor i tij. dhe në ditën më të rëndësishme të karrierës së tij do të jetë pranë Bagnaia për ta mbështetur.
Duket se Rossi, një legjendë e motoçiklizmit, ka gjetur pasardhësin e tij dhe do t’ia lërë trashëgiminë pikërisht Francesco Bagnaia. Pikërisht në Valencia, një vit më parë, ai zhvilloi garën e tij të fundit në karrierë.
Dhe kjo pistë, mund të bëhet skena ideale për të zyrtarizuar pasardhësin e tij. “Do të jem aty për ta mbështetur. Shpresoj që të shkojë gjithçka mirë dhe të festojmë të gjithë së bashku”, tha Rossi.
