Kreu i Partisë Demokratike, Sali Berisha, ka reaguar ashpër pas miratimit të reformës së re territoriale në Kuvend, duke e cilësuar votimin e mazhorancës si një “krim kolektiv” dhe një akt antikombëtar që, sipas tij, cenon interesat e qytetarëve.
Gjatë një komunikimi me gazetarët, Berisha kritikoi vendimin e marrë pas mesnatës, duke pretenduar se reforma godet drejtpërdrejt banorët e 15 bashkive të vendit.
Lideri demokrat akuzoi deputetët e mazhorancës se kanë votuar në kundërshtim me interesat e qytetarëve që përfaqësojnë, ndërsa pretendoi se vendimmarrja është ndikuar nga korrupsioni dhe interesat politike.
“Mbrëmë pas mesnate në një akt flagrant antikombëtar, anti-qytetar, krimi, pengmarrje dhe ryshfeti, mandatet e krimit u hodhën si shigjeta kundër qytetarëve të 15 bashkive të vendit për asgjësimin e tyre.
Deputetët e partisë së krimit në unison shkelmuan interesat e zgjedhësve të tyre, të marrë peng me korrupsionin e tyre, me vjedhjen dhe plaçkën që kanë siguruar me mandatin e tyre, ata votuan ne një krim kolektiv për asgjësimin e 15 bashkive“, u shpreh Berisha.
Duke vijuar kritikat ndaj hartës së re territoriale, kreu i PD-së theksoi rëndësinë që ka organizimi territorial për qytetarët dhe komunitetet vendore.
Sipas tij, reforma territoriale lidhet ngushtësisht me të drejtën e komuniteteve për vetëqeverisje, zhvillimin e zonave të tyre dhe ruajtjen e trashëgimisë kulturore e historike.
“Reforma territoriale është padyshim në raport me qytetarin dhe komunitetet, reforma më e rëndësishme, sepse kjo reformë ka të bëjë me vetëqeverisjen e komuniteteve, ka të bëjë me qeveritë vendore të cilat kanë mision zhvillimin e territorit të komunitetit. Kanë mision konservimin e trashëgimisë kulturore historike të komunitetit”, tha Berisha.
Burimi: botasot.info
