Deputeti i Aleancës për Ardhmërinë e Kosovës, Burim Ramadani, ka deklaruar se partia e tij nuk ka bërë asnjë marrëveshje me Qeverinë Kurti dhe se është opozita e vërtetë në vend. Gjendjen në Kosovë ai e përshkroi si “terr të madh”.
I ftuar në emisionin “Blic Interview me Astrit Gashin”, Ramadani tha se Aleanca nuk ka pasur as marrëveshje, as paramarrëveshje dhe as tentativë për marrëveshje me Qeverinë, të cilën e akuzoi se po e dëmton jashtëzakonisht Kosovën.
“Kosova është në terr të madh”, tha Ramadani. Ai sqaroi se e ka fjalën për rrymën, por se shprehja simbolizon edhe mënyrën e qeverisjes.
Sipas tij, qëndrimet opozitare të Aleancës nuk udhëhiqen nga inati politik, sepse partia jep vazhdimisht alternativa dhe propozime konkrete.
Një ditë pas masave emergjente
Deklarata vjen një ditë pasi Kuvendi i Kosovës miratoi, me 61 vota, vendimin e Qeverisë për masa emergjente në furnizimin me energji elektrike, të cilat do të jenë në fuqi për 60 ditë. Vjen edhe në javën kur kryeministri Albin Kurti dhe Partia Demokratike e Kosovës u pajtuan për një nismë të re ligjore për Dhomat e Specializuara.
Burimi: botasot.info


