Këshilli i Ministrave ka miratuar sot Strategjinë kombëtare për sigurinë kibernetike 2025–2030 dhe Planin e veprimit për periudhën 2025–2027, dokumente që synojnë forcimin e mbrojtjes së infrastrukturave kritike digjitale të vendit dhe rritjen e kapaciteteve shtetërore për parandalimin e sulmeve kibernetike.
Sipas vendimit të qeverisë, strategjia e re zëvendëson atë të miratuar për periudhën 2020–2025 dhe vendos bazat për një qasje më të koordinuar mes institucioneve shtetërore, sektorit privat dhe partnerëve ndërkombëtarë për mbrojtjen e sistemeve të informacionit.
Zbatimi i strategjisë do të udhëhiqet nga Autoriteti Kombëtar për Sigurinë Kibernetike (AKSK), në bashkëpunim me ministritë dhe institucionet e tjera përgjegjëse, raporton RTSH, përcjell KosovaPress.
Dokumenti parashikon masa konkrete për forcimin e sigurisë së rrjeteve të institucioneve shtetërore; ngritjen e ekipeve të reagimit ndaj incidenteve kibernetike; rritjen e ndërgjegjësimit publik për mbrojtjen digjitale; dhe krijimin e një kornize të unifikuar për raportimin dhe menaxhimin e sulmeve kibernetike. Strategjia e re konsiderohet një hap i rëndësishëm për përputhjen e standardeve të Shqipërisë me ato të BE-së dhe NATO-s në fushën e sigurisë digjitale.
Objektivat e strategjisë fokusohen në forcimin e mbrojtjes së infrastrukturave kritike dhe të rëndësishme të vendit, duke krijuar një kuadër ligjor dhe teknik që siguron vazhdimësinë e shërbimeve dhe stabilitetin e sistemeve të informacionit.
Qeveria shqiptare miratoi në parim Konventën e Kombeve të Bashkuara kundër Krimit Kibernetik, e nënshkruar vitin e kaluar në Nju-Jork, përmes së cilës Shqipëria angazhohet të përmirësojë legjislacionin penal për krimet kibernetike; bashkëpunojë me shtetet e tjera në hetimin dhe ndjekjen penale të autorëve; dhe të ndërmarrë masa për ndarjen e sigurt të të dhënave digjitale si prova ligjore.
Burimi: botasot.info
