6
Shkup, 13 shtator – Komisioni kuvendor për financim dhe buxhet e ka dhënë në procedim të mëtutjeshëm Propozim-ligjin për huanë prej gjysmë miliard euro nga Qeveria hungareze, e cila po miratohet me procedurë të shkurtuar. Seancën e drejtoi Bojan Stojanovski pasi kryetarja e Komisionit Sanja Lukarevska nuk e caktoi seancën në afatin e dhënë në Rregulloren e punës. Deputetët e LSDM-së nuk morën pjesë në punën e Komisionit.
Seanca kuvendore për votimin e huasë pritet të mbahet të martën e javës së ardhshme.
Propozim-ligjin e ka shpjeguar zëvendësministri i Financave Nikollçe Jankullovski. Shuma totale e kredisë që do të jepet nga Banka Hungareze e Eksport-Importit është 500 milionë euro. Kredia do të tërhiqet në një këst, afati për shlyerjen e kredisë është 15 vjet, me grejs periudhë prej tre vitesh, norma e interesit është fikse dhe është 3.25 për qind, Republika e Maqedonisë së Veriut do t’i paguajë Bankës hungareze për eksport-import, shoqëri private me përgjegjësi të kufizuar për fondet e patërhequra në masën 0.5 për qind të kredisë në vit. Provizioni për fondet e patërhequra do të llogaritet në baza ditore mbi pjesën e patërhequr të kredisë, e llogaritur nga data e disponueshmërisë së fondeve dhe do të paguhet në ditën e parë të punës pas përfundimit të periudhës së disponueshmërisë. Kredia do të shlyhet me 24 këste gjashtëmujore, në datat 15 shkurt dhe 15 gusht të çdo viti. Për më tepër, Republika e Maqedonisë së Veriut do t’i paguajë provizion për shërbimet e ofruara juridike një firme të pavarur të përzgjedhur nga Banka Hungareze e Eksport-Importit shoqëri private me përgjegjësi të kufizuar. Provizioni për shërbimet e kryera juridike do të paguhet përpara tërheqjes së transhës.
Deputeti i VMRO-DPMNE-së Bojan Stojanovski nga foltorja e komisionit, e më pas edhe nga konferenca për media, theksoi se kanë dështuar të gjitha përpjekjet e LSDM-së për të penguar projektet kapitale në komunat përreth Maqedonisë dhe mjetet e favorshme për investime në sektorin privat. Sipas tij, LSDM-ja gjatë ditës ka treguar sjellje joshtetërore duke u përpjekur të pengojë ndërtimin e çerdheve të reja, shkollave, këndeve të lojërave, garazheve në kate dhe projekteve të tjera të shumta infrastrukturore.
Projekti për 250 projekte për komunat u pranua nga qytetarët në zgjedhje. Deri në mëngjes, siç tha ai, aplikacione për projekte kanë dorëzuar 78 komuna me 353 projekte, duke përfshirë komunat e udhëhequra nga kryetarët e LSDM-së, Dellçevës, Strumicës, Probishtipit, Kriva Pallankës dhe Krushevës.
Në seancën e Kuvendit foli edhe koordinatori i grupit parlamentar, Nikolla Micevski, i cili sqaroi se në mandatin përkatës, kryetarja e Komisionit Financiar, Sanja Lukarevska nga LSDM, nuk ka dashur të caktojë seancë për kredinë dhe Kryetari i Kuvendit caktoi këtë seancë në bazë të nenit 126 paragrafi 3 i Rregullores së punës. Micevski akuzoi opozitën se dëshiron të bllokojë punën e Kuvendit.
LSDM qëndrimin për mospjesëmarrjen në seancë njoftoi se do ta bëjë të ditur përmes një kumtese.
BURIMI: zhurnal.mk
