Maqedonia e Veriut, Greqia dhe Shqipëria do të përgatisin një nominim të përbashkët për përfshirjen e Rajonit të Prespës në Listën e Trashëgimisë Botërore të UNESCO-s.
Ministrat e Kulturës të tri vendeve nënshkruan një deklaratë të përbashkët, përmes së cilës u zotuan për bashkëpunim më të madh në mbrojtjen e trashëgimisë natyrore dhe kulturore të këtij rajoni ndërkufitar.
Dokumenti u nënshkrua nga ministri i Kulturës dhe Turizmit i Maqedonisë së Veriut, Sedat Sulejmani, ministrja greke e Kulturës, Lina Mendoni, dhe ministri shqiptar i Turizmit, Kulturës dhe Sportit, Blendi Gonxhja.
Sipas Sulejmanit, synimi nuk është vetëm njohja ndërkombëtare e Prespës, por edhe krijimi i një sistemi afatgjatë për mbrojtjen e saj, me përfitime konkrete për banorët dhe komunitetet lokale.
Si shembuj të bashkëpunimit të deritanishëm u përmendën restaurimi i afreskeve në kishën “Shën Gjergji” në Kurbinovë, aktivitetet në ishullin Mal Grad në bashkëpunim me institucionet shqiptare dhe projekti “ACT4PRESPA”, i mbështetur nga Bashkimi Evropian.
Nisma synon që Prespa të shndërrohet në një shembull të bashkëpunimit ndërmjet tri shteteve fqinje për ruajtjen e trashëgimisë së përbashkët.
Burimi: lajmpress.org
