N.N. (identiteti i njohur për redaksinë e Radios Evropa e Lirë) është njëri nga 46 pjesëtarët e komunitetit serb që iu bashkuan Policisë së Kosovës, pas konkursit për plotësimin e pozitave vakante në drejtorinë për rajonin e veriut të Kosovës.
Në total, rreth 74 prej tyre nga radhët e komuniteteve joshumicë kanë filluar punën këtë javë.
“Pas përfundimit të trajnimit, ne u dislokuam në veri të Kosovës, ku nga e hëna shkoj çdo ditë me kolegët e mi”, thotë ai.
N.N. është nga një prej gjashtë komunave me shumicë serbe në jug të Ibrit dhe pranoi të flasë për Radion Evropa e Lirë në kushte anonimiteti, sepse “nuk është e lehtë të punosh në veri”.
“Kur kam aplikuar në polici kam qenë i vetëdijshëm për rrezikun që bart, aq më tepër që është veriu, të gjithë e dimë se si është situata aktuale”, vazhdon ai.Në veri të Kosovës janë katër komuna me shumicë serbe – Mitrovica e Veriut, Leposaviqi, Zveçani dhe Zubin Potok – ku tensionet janë rritur që nga fundi i majit pas ardhjes në pushtet të kryetarëve shqiptarë.
Kësaj, si dhe krizave të mëparshme në veri, u ka paraprirë dorëheqja e serbëve nga institucionet e Kosovës në nëntor të vitit të kaluar, duke përfshirë edhe punonjësit e policisë. Shkak ka qenë vendimi i Qeverisë së Kosovës për heqjen nga përdorimi të targave të automjeteve, të cilat lëshohen nga autoritetet serbe për qytetet e Kosovës.
Kështu, gjatë gjithë kohës në veri kanë qenë të pranishëm kryesisht policë shqiptarë. Ndërkohë, dy herë është shpallur konkursi për rekrutimin e policëve të rinj nga radhët e komuniteteve joshumicë në Kosovë.
Zyrtarët e Kosovës dhe diplomatët e huaj veçanërisht i inkurajuan serbët që të aplikojnë në këto konkurse.Deri më tani, në stacionin policor për rajonin e veriut punonin katër serbë, të cilët nuk dhanë dorëheqje, tha për REL-in zëvendësdrejtori i Policisë së Kosovës për veriun, Veton Elshani.
“Tani kemi 78 policë, 50 prej të cilëve janë serbë”, tha ai.
“Puna në Polici ka rëndësi për mua”
Bashkëbiseduesi i REL-it thekson se puna në Policinë e Kosovës ka shumë rëndësi për të, sidomos pas shumë vitesh kërkimi të një pune me “pagë të sigurt”.
“Kjo (punë) domethënë një lloj sigurie për mua, të paktën kur bëhet fjalë për sigurinë ekonomike”, thotë ai.
Ai shton se edhe më herët ka aplikuar për punë në Policinë e Kosovës, por edhe në institucione tjera. Megjithatë, deri më tani ai nuk ka pasur asnjë sukses.
“Kudo që kam aplikuar, nuk kam gjetur punë… Kjo punë më duhej shumë për shkak të detyrimeve familjare”, shprehet ai.
Ai shton se deri më tani nuk është përballur me presione apo kërcënime.
Sërish “shënjestrimi” i serbëve
Por, më 25 korrik, në kanalet e Telegramit filloi të qarkullojë një postim me fotografi gjoja të serbëve që iu bashkuan Policisë së Kosovës.
Në përshkrim janë publikuar emrat, për të cilët pretendohet se janë policë të rinj nga radhët e komunitetit serb, të cilët u thirrën edhe me emra pezhorativë, kurse përdoret edhe gjuha e urrejtjes ndaj shqiptarëve.
Kanalet në gjuhën serbe në Telegram përcjellin rregullisht ngjarjet në veri të Kosovës që nga shpërthimi i krizës dhe kjo nuk është hera e parë që dikush është në “shënjestër” apo shpërndahen dezinformata.
