Ndihma për pensionistët dhe përfituesit e asistencës minimale të garantuar do të paguhet drejtpërdrejt në llogaritë e transaksionit, e jo në vauçerë. Me vendim të Qeverisë rreth 330.000 pensionistë dhe 36.000 amvisëri që marrin ndihmë minimale të garantuar do të përfitojnë nga 1.000 denarë shtesë për muajt mars, prill dhe maj, deklaroi sonte ministrja e Punës dhe Politikës Sociale, Jovanka Trençevska.
Duke folur në ditarin qendror të TV Sitel, Trençevska tha se pret që ndryshimet në Ligjin për sigurim pensional dhe invalidor të kalojnë sa më shpejt në procedurë parlamentare në mënyrë që ndihma të paguhet sipas ritmit të paralajmëruar.
“Nuk do të ketë vauçerë, por nga 1000 denarë në tre muajt e ardhshëm pensionistët do t’i marrin në llogaritë e tyre transaksionale, së bashku me pagesën e pensioneve. Ata do të mund t’i përdorin këto fonde për të blerë ushqime, fatura të energjisë elektrike apo diçka tjetër. Për të arritur sa më shpejt paratë tek qytetarët që janë përfitues të ndihmës minimale të garantuar, pagesa prej 1000 denarëve në tre muajt e ardhshëm me siguri do të kryhet përmes llogarive të transaksionit”, tha Trençevska.
Ministrja shtoi se rreth 36.000 amvisëri do të marrin 1.000 denarë shtesë, si pjesë e paketës prej 26 masave antikrizë.
