Ministri i Punëve të Jashtme, Bujar Osmani, në konferencën e sotme me gazetarët zbuloi se persona të punësuar në institucionet e Maqedonisë së Veriut javën e kaluar kanë telefonuar në Bullgari për të mos u zgjidhur kontestin mes dy vendeve.
“Këtë javë në Republikën e Bullgarisë kanë thirrur njerëz nga Maqedonia e Veriut, duke thënë se i gjithë ai angazhim është i panevojshëm sepse këtu do të mbahen shpejt zgjedhjet, se do të ketë zgjedhje të parakohshme dhe se nuk mund të arrihet zgjidhje”, tha Osmani.
Ai nuk zbuloi për cilët persona dhe institucione bëhet fjalë, por shtoi se këta persona janë në të njëjtën linjë me dy punonjësit e Agjencisë Shtetërore të Sigurisë Kombëtare të Bullgarisë, të cilët kanë punuar që Maqedonia të mos ketë të ardhme evropiane.
