Është dita e dhjetë që po mblidhen.
Pjesëtarë të Njësisë Speciale Operative, të Njësisë së Trafikut e njësi tjera në kuadër të Drejtorisë Rajonale të Policisë në Prishtinë po zbatojnë operacionin “Goditja”.
Në sallën e takimeve, ata po marrin edhe instruksionet e fundit nga eprorët e tyre.
E me të përfunduar takimin, ata nisen drejt lokacioneve të caktuara.
Por, fillimisht po i kontrollojnë se a i kanë gati të gjitha pajisjet e nevojshme.
Me të arritur në lokacionin e caktuar, fillojnë edhe kontrollet e veturave.
Rezultatet e këtij operacioni, janë të menjëhershme.
Tek kjo veturë gjendet një armë e cila është pa leje të nevojshme.
Me këtë rast, specialët e Policisë arrestojnë të dyshuarin për të vazhduar me procedura ndaj tij.
Operacioni vazhdon edhe në pika tjera kontrolli, ku zyrtarët policorë janë të shpërndarë në gjithë qytetin e Prishtinës.
Edhe këtu, tek veturat e dyshimta bëhen kontrolle të detajuara nga pjesëtarët e Njësisë Speciale.
Përpos kontrolleve, tek shoferët që shkaktojnë kundërvajtje shqiptohen edhe gjoba të ndryshme.
E për ecurinë e këtij operacioni, tregon drejtori i Drejtorisë Rajonale të Prishtinës, Basri Shabani.
Ai thotë se tashmë i kanë intensifikuar veprimet e tyre për parandalimin e krimeve të ndryshme.
Operacioni “Goditja” ka nisur më 8 gusht pas disa vrasjeve që ndodhën në lokale të ndryshme në vendin tonë e ku deri më tash janë arrestuar 122 persona e janë konfiskuar 43 armë.
