Nuk ka marrëveshje me Qeverinë për rritje lineare të pagave për 2.806 denarë dhe nesër do të merret vendim për grevë të përgjithshme, deklaroi kryetari i LSM-së Darko Dimovski pas mbledhjes dy orëshe në Qeveri.
Dimovski tha se është i zhgënjyer nga bisedat me përfaqësuesit qeveritar, të cilët, siç theksoi, kanë përgjigje për gjithçka, por jo për gjënë kryesore – për rritje lineare të pagave prej 2.806 denarë.
“Kërkojmë rritje të menjëhershme të pagave. Goditjet e çmimeve dhe inflacioni dyshifror na japin të drejtën që menjëherë të kërkojmë korrigjim të pagave, sepse kjo nuk është më e qëndrueshme”, tha Dimovski.
Ai bëri të ditur se nesër do të mblidhen organet më të larta të LSM-së dhe pritet të merret vendim për grevë të përgjithshme.
Sindikata kërkonte takim me kryeministrin, zëvendëskryeministrin për Çështje Ekonomike dhe ministrat e Financave, të Punës dhe Politikës Sociale pas prezantimit të ribalancit të buxhetit, pasi u pa se nuk ishin planifikuar mjete për këtë kërkesë siç ishte premtuar gjatë negociatave.
LSM, me iniciativën e së cilës e diela është shpallur ditë jopune, nuk pajtohet me projekt-amendamentet e fundit ligjore që propozojnë e diela të jetë ditë pune në vendet turistike.
