Bordi Ekzekutiv i Komitetit Olimpik Ndërkombëtar (IOC) do të diskutojë për rezultatet e konsultimeve në lidhje me statusin e sportistëve nga Rusia dhe Bjellorusia në takimin e tij që do të zhvillohet nga nesër deri më 30 mars.
Organizata kishte njoftuar më parë se po kërkonte mënyra për të rikthyer të dy vendet në sportin ndërkombëtar, pasi më parë kishte rekomanduar që ato të ndaloheshin për shkak të pushtimit të Ukrainës.
Si rezultat, IOC ka zhvilluar një sërë konsultimesh me Komitetet Olimpike Kombëtare, Federatat Ndërkombëtare, përfaqësuesit e atletëve dhe anëtarët e saj, përcjellë KosovaPress.
Diskutimet u përqëndruan në temën e “solidaritetit me Ukrainën, sanksionet kundër Rusisë dhe Bjellorusisë dhe statusin e atletëve nga këto vende”.
Në ndryshimin e qëndrimit të saj për çështjen në fjalë, IOC ka sugjeruar që nëse Rusia dhe Bjellorusia kthehen, do të ishte nën “kushte të rrepta” neutraliteti.
Presidenti i IOC Thomas Bach ka mbrojtur vendimin për të kërkuar kthimin e atletëve rusë dhe bjellorusë, duke këmbëngulur se ka “përgjegjësi ndaj të drejtave të njeriut dhe Kartës Olimpike”.
Një propozim i sugjeruar ka qenë që atletët rusë dhe bjellorusë të konkurrojnë në garat aziatike, duke pasur parasysh kufizimet e udhëtimit dhe kundërshtimin ndaj pjesëmarrjes së tyre në Evropë.
