Në kuadër të Asamblesë së Përgjithshme të Asociacionit të Agjencive Evropiane të Lajmeve (EANA) të mbajtur në Paris, u nënshkrua marrëveshje për bashkëpunim ndërmjet Anadolu (AA) dhe Agjencisë Spanjolle të Lajmeve (EFE).
Para Asamblesë së Përgjithshme të EANA-s të mbajtur në Paris, Kryetari i Bordit të Drejtorëve dhe Drejtori i Përgjithshëm i AA-së Serdar Karagöz u takua me Drejtoreshën e EFE-s, Gabriela Canas.
Karagoz dhe Canas nënshkruan një kontratë midis AA-së dhe EFE-s për ndarjen e fotografive dhe përmbajtjeve.
Duke vlerësuar marrëveshjen e bashkëpunimit pas ceremonisë së nënshkrimit, Karagoz tha: “EFE është një agjenci shumë efektive, veçanërisht në rajonet dhe vendet spanjolle. Ky bashkëpunim mes AA-së dhe EFE-s synon rajonet ku nuk kemi korrespondentë dhe gazetarë të ndërsjellë. Të dyja agjencitë tani e tutje do të mbështesin njëra-tjetrën, veçanërisht për sa i përket përmbajtjes së lajmeve”.
Në Asamblenë e Përgjithshme të EANA-s, ku mori pjesë Karagöz, Fabrice Fries, drejtor i agjencisë franceze të lajmeve AFP, u bë kryetar i ri i EANA-s, ndërsa Claudia Nicolae, drejtore e përgjithshme e Agjencisë Kombëtare Rumune të Lajmeve (AGERPRES), u zgjodh anëtare e Bordit të Drejtorëve të EANA-s.
Në takim u diskutua dhe u miratua raporti vjetor i aktivitetit dhe buxheti i EANA-s. U vendos që takimi i EANA-s 2024 të mbahet në Portugali.
Karagöz deklaroi se agjencitë e lajmeve në mbarë botën shkëmbejnë përvoja nëpërmjet takimeve të tilla dhe shtoi:
“Si Anadolu, ne patëm mundësinë që përvojat tona t’ua përcillnim si agjencisë franceze të lajmeve AFP, ashtu edhe agjencive të tjera botërore të lajmeve në këtë platformë dhe dëgjuam përvojat e tyre. Presidenti i AFP-së (Fabrice Fries) u zgjodh kryetar i Asociacionit të Agjencive Evropiane të Lajmeve, e mbështetëm edhe ne në këtë tubim”.
Asambleja e Përgjithshme e EANA-s diskutoi gjithashtu pezullimin e anëtarësimit më parë nga EANA të agjencisë ruse të lajmeve TASS.
Si rezultat i votimit për përjashtimin e TASS-it nga anëtarësimi në EANA, u vendos që të vazhdojë anëtarësimi i tij.
Në lidhje me këtë çështje, Karagöz deklaroi se përjashtimi i TASS-it nga anëtarësia nuk u pranua si rezultat i votimit dhe se ishte pika më e rëndësishme e asamblesë.
