Në bombardimet e kryera nga avionët luftarakë izraelitë kundër Rripit të Gazës kanë humbur jetën edhe 2 gazetarë të tjerë, transmeton Anadolu.
Sipas agjencisë palestineze të lajmeve WAFA, kanë humbur jetën gazetaret Ala Taher al-Hasanat dhe Ayyat Khaddora pas shënjestrimit të shtëpive të tyre në rajonin Beit Lahia në veri dhe në kampin e refugjatëve Al-Bureij në pjesën qendrore të Gazës.
Khaddora deklaroi se “Kjo do të jetë video e fundit” në transmetimin me pamje që u lidh në kanalin televiziv Alghad në të cilin punonte për të transmetuar zhvillimet.
“Forcat izraelite kanë hedhur bomba me fosfor në Beit Lahia. Kanë shpërndarë njoftime (broshura) për evakuimin e rajonit”, tha Khaddora e cila me lot nën sy u shpreh: “Njerëzit janë nëpër rrugë si të çmendur dhe nuk dinë ku të shkojnë. Edhe ne në shtëpi jemi ndarë. Një pjesë e tyre kanë dalë dhe sigurisht që nuk e dimë se ku kanë shkuar. Situata është shumë e vështirë. O Zot na mëshiro”.
Edhe gazetarja Ala Taher al-Hasanat ka humbur jetën si pasojë e bombardimit që avionët izraelitë kryen ndaj shtëpisë së saj në kampin e refugjatëve Al-Bureij në pjesën qendrore të Gazës.
