Ka ndërruar jetë mësuesi dhe veprimtari i njohur nga Shkupi, Hazbi Topojani. Lajmin për vdekjen e tij e kanë bërë të ditur familjarët përmes një njoftimi publik, ku kanë ndarë dhimbjen për humbjen e tij.
I ndjeri për shumë vite punoi si mësimdhënës në shkollat fillore në Komunën e Çairit, duke dhënë kontribut të madh në edukimin e shumë gjeneratave. Krahas profesionit të mësuesit, ai ishte i njohur edhe për angazhimin e tij në jetën shoqërore dhe në iniciativa të ndryshme në të mirë të shoqërisë.
Në njoftimin e familjes, ndër të tjera thuhet se ai ishte baba i Ermalit, Urimit dhe Arbit, ndërsa familjarët janë lutur që Zoti ta mëshirojë dhe ta pranojë në mëshirën e Tij, duke rikujtuar se “të Allahut jemi dhe tek Ai do të kthehemi”.
Sipas njoftimit, falja e xhenazes do të bëhet në xhaminë e Çairit pas namazit të Ikindisë, ndërsa varrimi do të zhvillohet në varrezat e Butelit.
Ngushëllime për ndarjen e tij nga jeta kanë shprehur edhe parti politike dhe bashkëpunëtorë të tij, të cilët e kanë vlerësuar si mësues të përkushtuar, aktivist të palodhur dhe njeri të respektuar në shoqëri.
