“Pranvera në Çair po vjen me punë, investime dhe ndryshim që shihet çdo ditë në terren”, ka shkruar në faqen e tij zyrtare në facebook kryetari i Komunës së Çairit, Izet Mexhiti, duke theksuar dinamikën e projekteve infrastrukturore që po realizohen në këtë komunë.
Sipas Mexhitit, një ndër projektet më të rëndësishme që po i jep hov transformimit urban është rikonstruktimi i Rrugës Ferid Murat, ku punimet tashmë kanë avancuar dhe rezultatet janë të dukshme në terren.
Ky investim, siç thekson Mexhiti, nuk është vetëm një ndërhyrje e zakonshme infrastrukturore, por një hap konkret drejt modernizimit të zonës dhe përmirësimit të cilësisë së jetës për qytetarët.
Me ndërhyrje të plota rikonstruktive, rruga po merr formën e një aksi modern dhe funksional, duke reflektuar një vizion të ri zhvillimor që përputhet me ritmin e rritjes urbane dhe nevojat reale të banorëve, ka shkruar më tej Mexhiti.
