Kompanitë që tregtojnë me energji elektrike nga MEPSO kanë marrë fatura në vlerë pak më shumë se 63 milionë euro.
Ky është çmimi që duhet paguar për konsumin e vitit të kaluar të energjisë elektrike që kompanitë tërhoqën nga rezervat e sistemit evropian.
Drejtori i MEPSO-s, Orhan Murtezani, thotë për Alsat se kanë pagesa problematike në shumën prej 16 milionë eurosh, prej të cilave 9 milionë janë nga kompanitë që janë të përjashtuara nga tregu i energjisë elektrike dhe të cilave u është hequr licenca e punës.
Por, rastet janë në procedurë gjyqësore dhe ai pret epilog në dobi të shtetit.
Që këtë vit të mos përsëritet skenari i njëjtë i vitit të kaluar, drejtori thotë se duhet të ndryshohen disa rregulla të tregut.
Për shkak të rritjes së madhe të çmimit të rrymës në bursat botërore gjatë dimrit të kaluar, disa kompani të energjisë elektrike vendosën që në vend se të blejnë në tregun e lirë, të marrin rrymë nga rezervat sistemore, që do të përdoren vetëm nëse ka çrregullim në sistem.
Komuniteti evropian i energjetikës disa herë e ka paralajmëruar Maqedoninë se për shkak të këtyre hapave të kompanive, do të sanksionohet.
Më pas, disa nga këto kompani u dënuan dhe i kthejnë të hollat ndërsa disa kanë mbetur pa leje pune.
Kompetentët vlerësojnë se nevojitet të rriten garancitë bankare të kompanive që merren me tregti të rrymës.
