Melania Trump ka bërë një rrëfim të rrallë për jetën private të djalit të saj, Barron Trump, duke zbuluar këshillat që i jep për marrëdhëniet romantike dhe takimet, si dhe shqetësimin që ka për sigurinë e tij.
Zonja e Parë e SHBA-së, e cila rrallëherë flet publikisht për marrëdhënien me djalin e saj të vetëm, e ka ndarë këtë detaj në dokumentarin e ri “Melania, The Series”, i cili u publikua më 20 nëntor në platformën Amazon Prime Video.
“Gjithmonë i them se bota jashtë është e rrezikshme”, ka treguar Melania, duke shpjeguar se e këshillon Barronin 20-vjeçar të jetë veçanërisht i kujdesshëm në marrëdhëniet personale.
Ajo theksoi gjithashtu se, pavarësisht vështirësive që mund të hasë gjatë rritjes dhe pavarësimit të tij, djali do ta ketë gjithmonë mbështetjen e saj.
“Ne kemi një komunikim shumë të hapur për jetën. Unë do të jem gjithmonë pranë tij. Jam dhe do të jem gjithmonë. Ai e di se është përparësia ime dhe do të mbetet gjithmonë i tillë”, u shpreh ajo.
Barron Trump dhe interesimi i vajzave për të
Jeta private e djalit të presidentit amerikan mbetet kryesisht larg vëmendjes publike, megjithëse mediat kanë publikuar herë pas here informacione për marrëdhëniet e tij dhe popullaritetin mes vajzave të moshës së tij.
Në tetor të vitit 2025, disa raportime pretenduan se Barron kishte pritur një vajzë të re në Trump Tower, në Manhatan, ku ishte marrë një masë e pazakontë sigurie.
Sipas këtyre raportimeve, një kat i tërë i rrokaqiellit ishte rezervuar për të garantuar privatësinë dhe sigurinë gjatë takimit.
Ngjarja u komentua edhe në televizionin Fox News. Moderatorja Julie Banderas, gjatë një diskutimi në emisionin e Jesse Watters, bëri batuta për jetën sentimentale të të riut.
“Ky djalë di si ta luajë lojën”, komentoi ajo, duke iu referuar interesimit që Barron thuhet se ngjall te vajzat.
Shaka nuk munguan as për rezultatin e takimit, ndërsa moderatorja la të kuptohej me humor se shpresonte që gjithçka të kishte përfunduar mirë.
Barron Trump, i cili është rreth 2.03 metra i gjatë, studion në Shkollën e Biznesit Stern të Universitetit të Nju Jorkut (NYU).
Pavarësisht profilit të tij të rezervuar, mediat amerikane e kanë përshkruar si një nga studentët që tërheq vëmendjen e shumë vajzave në universitet.
Një burim i cituar nga revista “People” pretendonte se Barron ishte mjaft i pëlqyer nga bashkëstudentet, pavarësisht bindjeve të tyre politike.
“Është i gjatë dhe i pashëm. Shumë njerëz duket se e konsiderojnë mjaft tërheqës. Po, edhe njerëzit me bindje liberale e pëlqejnë”, thuhej në deklaratën e burimit.
“Ai ka padyshim sukses te vajzat. Është vërtet shumë popullor”, shtonte i njëjti burim.
Megjithatë, këto pretendime nuk janë konfirmuar nga vetë Barron, i cili vazhdon të shmangë deklaratat publike për jetën e tij private.
Studimet, siguria dhe roli në fushatën e babait
Edhe jeta universitare e djalit më të vogël të Donald Trump ka tërhequr vëmendjen e mediave amerikane.
Në shtator të vitit 2025, mungesa e tij gjatë javës së parë të mësimit në Nju Jork ngriti pikëpyetje nëse ai po vazhdonte studimet në universitet.
Në atë kohë, përfaqësues të sigurisë së institucionit kishin deklaruar se, sipas informacioneve që dispononin, Barron po ndiqte semestrin në një kampus tjetër të NYU-së.
Më vonë u raportua se ai ishte zhvendosur në Shtëpinë e Bardhë, për të vijuar studimet në kampusin e universitetit në Uashington.
Ndërkohë, në maj të vitit 2025, “Daily Mail” kishte raportuar se Barron po përballej me vështirësi për t’u përshtatur me jetën studentore dhe për të krijuar marrëdhënie shoqërore. Sipas gazetës, prania e vazhdueshme e agjentëve të Shërbimit Sekret përreth tij e bënte më të vështirë afrimin e bashkëstudentëve dhe krijimin e miqësive.
Donald Trump kishte kundërshtuar këtë imazh disa muaj më vonë, kur mbesa e tij, Kai Trump, e pyeti për përvojën universitare të Barronit. Presidenti amerikan u përgjigj se djali i tij “po ia kalon mirë”.
Megjithëse vazhdon të mbajë një profil të ulët publik, Barron është përfshirë gjithnjë e më shumë në disa aspekte të strategjisë politike dhe komunikimit të familjes Trump.
Sipas raportimeve mediatike, ai kishte dhënë këshilla për strategjinë e komunikimit të babait të tij përpara zgjedhjeve presidenciale të vitit 2024, duke sugjeruar mënyra për të tërhequr votuesit e rinj.
Në veçanti, ai thuhet se e kishte këshilluar Donald Trumpin të merrte pjesë në podkaste të njohura mes të rinjve të gjeneratës Z dhe brezit të millennials, si ato të Logan Paul dhe Joe Rogan.
Barron ishte gjithashtu i pranishëm në një aktivitet të UFC-së në Shtëpinë e Bardhë gjatë verës së vitit 2026, ndërsa në shkurt kishte ndjekur fjalimin vjetor të babait të tij për gjendjen e kombit, të njohur si “State of the Union”.
Burimi: botasot.info

