Organizata joformale e shkollave të mesme të Beogradit, PULS ka organizuar sonte një protestë në kryeqytetin e Serbisë.
Protesta filloi me 17 minuta heshtjeje, duke nderuar viktimat e shembjes së tendës së stacionit hekurudhor më 1 nëntor 2024 në Novi Sad dhe viktimave nga zjarri më 16 mars në Koçan tëMaqedonisë së Veriut.
Duke bërë homazhe për viktimat, pjesëmarrësit e tubimit mbajtën dritat e telefonave ndezur. Përfaqësuesit e kësaj organizate joformale në tubimin në “London” erdhën nga Terazia e Sllavia, Ministria e Arsimit dhe Gjykata Kushtetuese, raportojnë mediat serbe.
Protesta vjen pasi presidenti serb Aleksandar Vuçiq tha sot për Washington Examiner, se protestuesit më 15 mars në Beograd “shkatërruan 186 traktorë”, e të cilët në fakt regjimi i tij i kishte sjellë për të penguar zhvillimin e protestës,.
“E vetmja përleshje e madhe që ata bënë ishte mes tyre, askush nuk iu përgjigj, nuk donim të arrestonim njeri. Në fund na u desh të arrestonim 44 persona. 13 prej tyre u arrestuan për shkak se ishin të dehur apo nxitnin dhunë”, theksoi presidenti serb.
Protestat në Serbi kanë shpërthyer pasi më 1 nëntor 2024 u shemb një tendë e strehës hekurudhore në Novi Sad, si pasojë e së cilës 15 persona humbën jetën dhe disa të tjerë u lënduan. Në protestën e madhe më 15 mars në Beograd ndaj protestuesve u përdor topi akustik që shkaktoi largimin e tyre nga rrugët.
Burimi: botasot.info
