27 janar – Marrëveshjet nga “Ballkani i Hapur”, të cilat parashikojnë punëtorët nga Maqedonia, Serbia dhe Shqipëria të konkurojnë në tregun e punës në të tre vendet, nuk janë ratifikuar vetëm në parlamentin maqedonas.
Në një prononcim për CIVIL Media, kryetari i Komisionit për politikë të jashtme, Antonijo Milloshoski, thotë se presin që Kuvendi të caktojë seancë dhe të votojë Marrëveshjen për kushtet për qasje të lirë në tregun e punës në Ballkanin Perëndimor.
“Kjo marrëveshje është votuar para vitit të ri në seancën e 24-të të komisionit, tani varet nga Kuvendi se kur do të vihet në rend dite”, shton Milloshoski.
Kuvendi për shkak të pushimeve nuk i ka caktuar të gjitha seancat dhe për këtë për CIVIL Media thonë se varet nga kryetari Talat Xhaferi se kur do të caktohet seanca e 84-të.
Koordinatori kombëtar për “Ballkanin e Hapur” dhe bashkëpunimin rajonal, Marjan Zabrçanec, thotë se të tre vendet janë plotësisht të përgatitura për heqjen e vizave të punës, i vetmi parakusht është që marrëveshjet të miratohen nga Kuvendi.
-Ka pasur arsye objektive dhe pengesa pse Kuvendi i Maqedonisë nuk i kishte votuar ratifikimet e marrëveshjeve nga Ballkani i Hapur dhe këto kryesisht për shkak të bllokadës nga opozita. Megjithatë, dy nga marrëveshjet, ato për heqjen e lejeve të punës, kaluan në komisionin e jashtëm në Kuvend, pasi opozita guxoi të hiqte bllokadën, thotë ai.
Sipas Zabrçanec, tani nuk ka pengesa, ka mbetur vetëm një hap, ai është votimi përfundimtar në seancë plenare, i cili do të plotësojë të gjitha kushtet për heqjen e lejeve të punës në sektorin e biznesit për qytetarët e Maqedonisë së Veriut, Serbisë dhe Shqipërisë.
Të gjitha apelet i drejtohen Kuvendit, të futen në rendin e ditës sa më shpejt të jetë e mundur dhe që deputetët të ratifikojnë të gjitha marrëveshjet ndërkombëtare që dalin nga Ballkani i Hapur, me çka do të hyjnë në fuqi të gjitha masat dhe benefitet të cilat u ndihmojnë kompanive, dhomat e tregtisë, qytetarëve. Nëse opozita ka një minimum pragmë politike dhe ndjenjë për nevojat e qytetarëve, nuk duhet të mendojë të mos mbështesë ratifikimin e ligjeve. Për ratifikimet mjafton shumica e partive në pushtet, por duke pasur parasysh që Open Balkan ka mbështetjen e pothuajse 80% të qytetarëve të vendit dhe një shumicë të madhe të qytetarëve në dy vendet fqinje, ratifikimet duhet të marrin të paktën 2/ 3 mbështetje në Kuvend, thotë Zabrçanec.
Përfitimi kryesor i heqjes së lejeve të punës është sigurimi i kushteve më të mira të lëvizshmërisë në tregun e punës në rajon, pra midis tre shteteve. Më konkretisht, po hiqen procedurat burokratike dhe administrative që kanë ngadalësuar deri tani procesin.
Ai kontribuon drejtpërdrejt në një nga qëllimet kryesore të shumicës së nismave rajonale – krijimin e një tregu të vetëm të punës. Do të mundësohet shkëmbimi i fuqisë punëtore sipas nevojave të tregut, në të gjitha drejtimet e mundshme mes tre vendeve. Kompanitë nga Kumanova dhe Shkupi do të mobilizojnë fuqinë punëtore nga Vranja dhe rrethinat e saj, dhe ato nga Struga nga rajoni kufitar në Shqipëri.
Personeli maqedonas i IT-së do të mund të punojë online nga vendi ynë për tregjet në Shqipëri dhe Serbi, duke marrë paga dhe kontribute nga dy vendet e tjera dhe të ardhurat t’i realizojë në vendin e tyre. Sigurisht kuptohet edhe anasjelltas.
Potencialet janë të mëdha, ka një numër të madh kompanish për të cilat kjo masë do të nënkuptojë plotësimin e vendeve të reja të punës, dhe për qytetarët dhe veçanërisht të rinjtë mundësi për të fituar më shumë. Kjo masë kontribuon gjithashtu që rajoni të prezantohet si një treg i vetëm përballë investitorëve më të mëdhenj, për të cilët ka ndryshim nëse investojnë në një treg me dy apo në një treg prej 12 milionësh.
Numri i identifikimit do të jetë i ngjashëm me numrin e identitetit për qytetarët e “Open Balkan”. Nëpërmjet ueb portalit për shërbime elektronike qytetarët do të mund ta marrin atë numër identifikimi dhe kështu praktikisht nuk do të duhet të marrin leje pune për Serbi apo Shqipëri.
Nisma e Ballkanit të Hapur, e cila filloi si Mini Shengen në tetor 2019 në Novi Sad, vendosi një objektiv ambicioz për të mos pasur kufij midis tre vendeve dhe qarkullim të lirë të kapitalit, njerëzve, mallrave dhe shërbimeve deri në fillim të vitit 2023. Nënshkrues të Nismës janë Serbia, Maqedonia dhe Shqipëria.//Zhurnal.mk
Burimi: zhurnal.mk
