Presidenti i Francës, Emanuel Makron, është shprehur i gatshëm të jetë nikoqir i përfaqësuesve të RMV-së dhe Bullgarisë, “kur të vijë koha”, për t`i ndihmuar Shkupin dhe Sofjen të arrijnë marrëveshje dypalëshe që do të mundësonte përfundimisht të hapen negociatat për anëtarësim të RMV-së në BE.
“Franca tashmë disa javë kërkon zgjidhje për kontestin midis dy vendeve fqinje” – ka njoftuar Pallati i Elyzesë pas bisedave të mbrëmshme telefonike të Presidentit Macron me Kryeministrin e RMV-së, Dimitar Kovaçevski dhe Presidentin bullgar, Rumen Radev.
Në komunikatë gjithashtu thuhet se Makroni në bisedat telefonike ka dhënë mbështetje të plotë për arritjen e marrëveshjes midis dy vendeve, që do të kontribuonte për fqinjësi të mirë dhe do ta përforconte perspektivën evropiane të RMV-së.
Bullgaria vazhdon ta bllokojë aderimin e RMV-së drejt BE-së që nga Nëntori 2020 për shkak të kontesteve që lidhen me gjuhën dhe historinë.
Në vitin 2019, Presidenti francez Macron, bashkë me dy vende anëtare të BE-së, vendosi veto për hapjen e negociatave aderuese të RMV-së dhe Shqipërisë, duke vlerësuar se nuk janë plotësuar kushtet për zgjerimin e BE-së me këto dy vende.
