Këshilli Qendror i LSDM-së mori vendim për formimin e grupit punues për vazhdimin e bisedimeve me VMRO-DPMNE-në dhe të gjitha partitë e tjera parlamentare për operacionalizimin e hapave konkretë të ardhshëm. Ky grup punues do të udhëhiqet nga sekretari i përgjithshëm i partisë, Mile Zeçeviq – Vardarski, njoftoi zëdhënësja e partisë, Bogdanka Kuzeska.
“Bordi qendror i LSDM-së në seancën e sotme ka marrë vendim për formimin e grupit punues për vazhdimin e bisedimeve me VMRO-DPMNE-në dhe të gjitha partitë tjera politike parlamentare për operacionalizimin e hapave konkretë të ardhshëm me qëllim të miratimit të amendamenteve kushtetuese dhe arritjes së qëllimit strategjik të vendit për anëtarësimin në Bashkimin Evropian”, njoftoi në një konferencë për media pas seancës, zëdhënësja e LSDM-së Bogdanka Kuzeska.
Ajo theksoi se Këshilli Qendror e përshëndeti hapin e parë të kryetarit të VMRO-DPMNE-së me pranimin e amendamenteve kushtetuese.
“Këshilli i LSDM-së vlerëson se e gjithë kjo është një bazë e mirë për vazhdimin e dialogut me të gjitha partitë politike parlamentare. Prandaj, në bazë të vendimeve dhe konkluzioneve të seancës, KQ mori vendim për formimin e grupit punues për vazhdimin e bisedimeve me VMRO-DPMNE-në dhe të gjitha partitë e tjera parlamentare për funksionalizimin e hapave konkretë të ardhshëm. Ky grup punues do të udhëhiqet nga sekretari i përgjithshëm i partisë, Mile Zeçeviq – Vardarski”, theksoi Kuzeska.
Burimi: TV21
