Lideri i opozitës në Mbretërinë e Bashkuar, Keir Starmer, njëkohësisht kryetari i Partisë Laburiste kërkoi të enjten zgjedhje të përgjithshme të menjëhershme pasi kryeministrja Liz Truss njoftoi dorëheqjen e saj pas vetëm gjashtë javësh në pushtet.
“Konservatorët nuk mund t’i përgjigjen rrëmujës së tyre të fundit duke zgjedhur përsëri njerëzit në krye pa pëlqimin e popullit britanik. Ne kemi nevojë për zgjedhje të përgjithshme — tani,” tha kreu i Partisë Laburiste.
Partia Konservatore “ka treguar se nuk ka më një mandat për të qeverisur,” shtoi ai.
“Pas 12 vitesh dështimi të konservatorëve, populli britanik meriton shumë më mirë se kjo derë rrotulluese kaosi.
“Tani, ata e kanë shkatërruar ekonominë aq keq sa njerëzit po përballen me 563 dollarë në muaj shtesë në hipotekat e tyre. Dëmi që ata kanë bërë do të duhen vite për t’u rregulluar.
“Secila prej këtyre krizave është bërë në Downing Street, por është paguar nga publiku britanik. Secila prej tyre e ka lënë vendin tonë më të dobët dhe më keq se më parë”, tha ai.
Lideri i Konservatorëve Skocezë, Douglas Ross, u shpreh se zonja Truss kishte marrë “vendimin e duhur”.
“Tani duhet të ecim përpara shpejt dhe kryeministri i ri do të duhet të rivendosë stabilitetin për të mirën e vendit”, tha ai në një postim në rrjetet sociale.?REL
