Burim Latifi, Drejtor i Përgjithshëm dhe Kryetar i Këshillit Drejtues të Sh.A. MEPSO, ka reaguar ashpër ndaj çdo iniciative për bashkëpunim me Bashkimin Demokratik për Integrim (BDI), duke e cilësuar si një shkelje të rëndë të vullnetit popullor.
“Në zgjedhjet e fundit, 107 mijë vota të pastra shqiptare u dhanë për ndryshim, jo për riciklimin e të vjetrës,” u shpreh Latifi. Ai kujtoi se mobilizimi popullor që solli BDI-në në opozitë pas më shumë se dy dekadash ishte i motivuar nga një premtim për frymë të re në qeverisje dhe politikë parimore.
Sipas tij, çdo takim me drejtuesit e BDI-së bie ndesh me idealet që bashkuan para një viti pesë forcat politike shqiptare – Lëvizja Demokratike, Besa, Alternativa, Aleanca dhe Vetëvendosje – të cilat ndërtuan një koalicion mbi premtimin për ndryshim të vërtetë.
“Marrëveshjet kontraverse me BDI-në paraqesin devijim të skajshëm nga ajo për të cilën qytetarët na besuan,” përfundoi Latifi, duke i bërë thirrje lidershipit politik shqiptar që të mbajë fjalën dhe të mos e tradhtojë shpresën e qytetarëve.
Burimi: lajme24.mk
