Kurti takohet me Princin e Kurorës së Kuvajtit në New York

Kryeministri i Kosovës, Albin Kurti, gjatë qëndrimit në SHBA është takuar në New York me Princin e Kurorës së Kuvajtit, Sheikh Sabah Khaled Al-Hamad Al-Sabah, në margjinat e sesionit të 81-të të Asamblesë së Përgjithshme të OKB-së.

Kurti tha se gjatë takimit u diskutua për forcimin e bashkëpunimit mes Kosovës dhe Kuvajtit, veçanërisht në ekonomi, investime dhe mbrojtje.

Ai bëri të ditur se palët shprehën gatishmërinë për marrëveshje për bashkëpunim ekonomik, shmangien e tatimit të dyfishtë dhe mbrojtjen e investimeve.

Kurti kërkoi gjithashtu mbështetjen e Kuvajtit për anëtarësimin e Kosovës si vëzhguese në Organizatën e Bashkëpunimit Islamik.

Postimi i Kurtit:

Në margjinat e punimeve të sesionit të 81-të të Asamblesë së Përgjithshme të Kombeve të Bashkuara në New York, pata një takim të përzemërt me Princin e Kurorës së Shtetit të Kuvajtit, Shkëlqesinë e Tij Sheikh Sabah Khaled Al-Hamad Al-Sabah.

Miqësia mes Kosovës dhe Kuvajtit nuk lindi në kohë të qeta. Në vitin 1999, kur populli ynë po dëbohej dhunshëm nga shtëpitë e veta, një nismë televizive në Kuvajt mblodhi shtatë milionë dollarë për një ditë të vetme për Kosovën. Vetë Emiri i ndjerë dhuroi një milion dollarë.

Kuvajti e di nga përvoja e vet ç’do të thotë të përjetosh agresionin e okupimin, ta humbasësh lirinë dhe ta rifitosh me ndihmën e aleatëve. Mbase për këtë e kuptoi Kosovën shpejt dhe mirë. Ne nuk e harrojmë këtë solidaritet.

Shkëlqesia e Tij falënderoi Republikën e Kosovës për përkrahjen në luftimin e ekstremizmit në rajonin e Gjirit. Ndërsa biseduam edhe për kontributin e Forcës së Sigurisë së Kosovës në misionin paqeruajtës në Kuvajt si pjesë e Gardës Kombëtare të Iowa-s.

Më 11 tetor 2011, Kuvajti e njohu Republikën e Kosovës si shteti i 82-të në botë. Këtë muaj mbushen 15 vjet të marrëdhënieve diplomatike mes dy vendeve tona. Gjatë gjithë kësaj kohe, në rrugën tonë drejt organizatave ndërkombëtare, Kuvajti ka qëndruar me ne. Për këtë mbështetje të çmuar dhe të vazhdueshme, Shkëlqesisë së Tij i shpreha falënderimet e popullit të Kosovës.

Tani është koha për një hap të ri domethënës: këtë miqësi ta kthejmë në partneritet konkret në rrugën e zhvillimit ekonomik. Shprehëm gatishmërinë tonë për ta nënshkruar memorandumin për Komisionin e Përbashkët për Bashkëpunim, i cili do t’u japë marrëdhënieve tona mundësi të reja dhe një kornizë të qëndrueshme. U pajtuam që së shpejti do t’i përmbyllim edhe marrëveshjen për shmangien e tatimit të dyfishtë dhe marrëveshjen për mbrojtjen e investimeve.

Kërkuam gjithashtu mbështetjen e Kuvajtit që Kosova të fitojë statusin e vëzhguesit në Organizatën e Bashkëpunimit Islamik.

Nevoja dhe vullneti i përbashkët për bashkëpunim ekonomik më të gjerë dhe më të thellë lidhen doemos me arritjet e Kosovës në sektorë kyç, si teknologjia e informacionit dhe industria e mbrojtjes, e ku të rinjtë dhe kompanitë tona po dëshmojnë çdo ditë se Kosova është vend i talentit, i punës dhe i mundësive.

Nga solidariteti i vitit 1999 te partneriteti i së ardhmes: Kosova dhe Kuvajti, miq të vërtetë.