Kryetari i Komunës së Butelit, Darko Kostovski, njoftoi se po vazhdojnë aktivitetet ndërtimore për realizimin e mega-parkut në bulevardin “Hristijan Todorovski-Karposh”, projekt që po zbatohet në bashkëpunim me Qytetin e Shkupit.
Sipas Kostovskit, sot ai së bashku me kryetarin e Qytetit të Shkupit, Orce Gjorgjievski, kanë inspektuar nga afër punimet në terren.
Ai theksoi se hapësira e lënë pas dore përgjatë bulevardit po shndërrohet në një zonë moderne dhe funksionale të gjelbër, e cila do të përfshijë sipërfaqe të gjera të gjelbra, shesh, kënde për fëmijë, shtigje për këmbësorë dhe zona fitnesi, me përmbajtje të dedikuara për të gjitha grupmoshat.
“Investimi në sipërfaqe të gjelbra është investim në shëndetin dhe të ardhmen e qytetit”, ka deklaruar Kostovski.
Ai shtoi se Komuna e Butelit dhe Qyteti i Shkupit po vazhdojnë zhvillimin urban dhe modernizimin e infrastrukturës në interes të qytetarëve.
