Një korridor humanitar nga qyteti i rrethuar juglindor i Ukrainës, Mariupol, do të jetë në funksion të hënën, sipas një zyrtari të lartë ukrainas, pavarësisht vonesave dhe vështirësive për të mbajtur të hapur rrugën për evakuim.
“Rruga do të funksionojë për transportin privat. Pesëmbëdhjetë autobusë evakuimi janë nisur tashmë nga Zaporizhzhia për në Mariupol,” tha Iryna Vereshchuk, zëvendëskryeministrja ukrainase dhe ministre e riintegrimit të territoreve të pushtuara përkohësisht, shkruan CNN, përcjell “Bota sot”.
Të dielën, shtatë autobusë të shoqëruar nga një delegacion i Komitetit Ndërkombëtar të Kryqit të Kuq arritën në Manhush, tha Vereshchuk.
Nëse kolona e shoqëruar nga ICRC arrin në Mariupol, do të ishte rasti i parë i evakuimit të organizuar me autobusë nga qyteti i bombarduar.
“Ne gjithashtu do të vazhdojmë evakuimin e njerëzve nga Severodonetsk, Popasna, Lysychansk, Rubizhne dhe fshati Nyzhnie i rajonit të Luhansk,” tha Vereshchuk, duke iu referuar komuniteteve në lindje të Ukrainës që kanë parë luftime intensive dhe janë nën bombardime të rënda.
