Koreja e Veriut paralajmëroi se gjenden në “prag të konfliktit bërthamor për shkak të veprimit provokues ushtarak të SHBA-së”, raporton Anadolu.
Duke reaguar ndaj raporteve se SHBA po planifikon të dërgojë nëndetësen bërthamore strategjike në Korenë e Jugut, Pheniani e quajti atë “veprim provokues ushtarak” dhe tha se “dëshmon qartë se situata e gadishullit Korean po i afrohet pragut të konfliktit bërthamor”.
“Kjo është një situatë shumë e rrezikshme pasi do të sjellë tensionet ushtarake rajonale në një gjendje më kritike dhe mund të nxisë krizën më të keqe të konfliktit bërthamor në praktikë”, tha Ministria e Mbrojtjes e Koresë së Veriut në një deklaratë për agjencinë shtetërore të lajmeve KCNA.
Kjo nënkupton se armët bërthamore strategjike amerikane do të shfaqen në Gadishullin Korean për herë të parë që nga viti 1981, thuhet në deklaratë, duke akuzuar Washingtonin për “shantazhin më të hapur bërthamor kundër” Phenianit.
Kina javën e kaluar tha se përqendrimi ushtarak dhe presioni në Gadishullin Korean vetëm se do t’i hapin rrugën një “gracke sigurie tensioni dhe antagonizmi”.
Duke e quajtur atë një “kërcënim dhe sfidë të rëndë për paqen dhe sigurinë rajonale dhe globale”, Pheniani tha: “Të gjitha faktet tregojnë qartë se kush kryen provokime dhe kush është e vetëpërmbajtur, dhe kush kërcënon dhe kush kërcënohet në gadishullin Korean”.
“Nëse krijohet ose jo një situatë ekstreme, që askush nuk e dëshiron, në gadishullin Korean, varet nga veprimi i ardhshëm i SHBA-së dhe nëse ndodh ndonjë situatë e papritur në të ardhmen, SHBA-të do të mbajnë përgjegjësi totale për të”, paralajmëroi Pheniani.
Më tej tha se vendosja e aseteve strategjike nga SHBA “nuk do të çojë kurrë në promovimin e sigurisë, por përkundrazi do të bëhet një fatkeqësi që do të sjellë një krizë sigurie më të dhimbshme dhe shqetësuese të cilën edhe ata vetë nuk e duan”.
Pheniani akuzoi SHBA-në se “po bëhet më e tërbuar në spiunazhin e saj ushtarak kundër sovranitetit” të Koresë së Veriut.
“Kohët e fundit, SHBA-të kanë kryer aktivitete armiqësore spiunazhi në gadishullin Korean dhe në afërsi të tij në një nivel të paprecedentë duke mobilizuar intensivisht mjete të ndryshme zbulimi ajror të vendosura në zonën operacionale të Azi-Paqësorit”, thuhet në deklaratë.
Deklarata tha se Koreja e Veriut “po analizon qëllimin e vërtetë të SHBA-së që kryen në mënyrë të dukshme një veprim të tillë ushtarak të pamatur … ndërsa vëzhgon çdo lëvizje provokuese”.
“Tani po ruajmë durimin dhe vetëkontrollin tonë maksimal, por gjithçka ka kufirin e vet. Tani është koha kur SHBA është afër pikës kritike për t’u shqetësuar”, thuhet ndër të tjera.
Duke i bërë thirrje SHBA-së që të “ndalojë menjëherë” të gjitha “lëvizjet provokuese”, Pheniani tha: “Ne po dërgojmë një paralajmërim serioz për të gjitha veprimet ushtarake të rrezikshme dhe provokuese të SHBA-së që bëhen gjithnjë e më të hapura”.
